DILI pa angay nga mopausbaw karon sa presyo sa nag-unang mga palaliton labi na sugar-sweetened beverages ang mga tindahan sumala sa usa ka opisyal sa Department of Trade and Industry sa Sugbo.
Si Zaide Bation, pangu sa Consumer Protection Division sa DTI Cebu, niingon nga dili pa mahimo mopaumento sa presyo ang dagkong mga tindahan kay base sa gihimo nga inventory, ang maong mga produkto daan pa nga mga stock nga diha na sa wala pa ipatuman ang bag-ong buluhisan ubos sa Tax Reform for Acceleration and Inclusion (TRAIN) sa administrasyon ni Presidente Rodrigo Duterte.
Siya nagtuo nga gikonsiderar usab sa mga tag-iya og dagkong tindahan ang kompetisyon, hinungdan nga dili kini magpatuyang sa pagpasaka sa presyo sa ilang mga produkto.
“Sa Colon lang gani daan, gasunod ra baya na sila, gatupad, dili sila magpatuyang tungod sa competition,” pahayag ni Bation sa pakighinabi sa Superbalita Cebu kagahapon.
Ang DTI hugot nga maniid sa presyo sa mga palaliton sa mga tindahan ug merkado human niepekto na ang bag-ong tax reform law.
Si DTI Secretary Ramon Lopez unang niingon sa press conference sa kaulohan nga di pa angay mopaumento sa mga presyo sa produktong petrolyo ug sugar-sweetened beverages hangtod sa Enero 21 kay daan pa nga mga stock ang naka-display, nga diha na sa panahon nga wala pa gipatuman ang Republic Act 10963.
Apil sa mga provision sa TRAIN Act nga makahatag og impact sa mga konsumedor ang excise tax sa fuel ug mga sugar-sweetened beverage (SSB) tax. (SCG)