MANAGLAHI ang reaksyon sa yanong mga lungsuranon sa plano sa Cebu Integrated Transport Cooperative (Citrasco) nga moduso og petition sa Land Transportation Franchising and Regulatory Board aron mahimo nga P12 ang minimum nga plitehan sa mga public utility jeepney.
Alang ni Vhince Adrian Lagura, 18 ug Grade 12 nga tinun-an sa Computer Programming and Hardware Services sa University of Cebu main campus, dako ra ang P12 alang sa minimum nga plitehan nga sama niya nga usa ka estudyante nga nagsalig sa allowance nga ihatag sa iyang mga ginikanan.
“Mahal ra ang P12 para sa mga mosakay nga duol ra ang adtuan,” pahayag niini.
Matag adlaw, mogasto siya og P80 nga plitehan gikan sa lungsod sa Cordova diin siya nagpuyo hangtod sa iyang gitunghaan sa dakbayan sa Sugbo.
Sama ni Lagura, si Conciorcia Diaz, 77, manindahay og kandila sa Basilica Minore del Santo Niño, ug lumad nga taga lungsod sa Barili, gidak-an ra usab kon mahimong nang P12 ang minimum nga pletihan sa PUJ.
Siya nipadayag nga mas maayo nga magkaabot sa tungatunga ang mga drayber ug pasahero nga inay P12, P8 lang ang pletihan sa unang lima ka kilometro, gikan sa kasamtangan nga P6.50 samtang P6 kon senior citizen o estudyante.
Samtang si Alexia Baya, usa ka housewife, way supak nga mahimong P12 ang minimum nga plitehan sa PUJ.
Apan siya nanghinaot nga mosaka usab ang suhulan sa mga mamumuo sama sa iyang bana labi na kon moepekto na sa hingpit ang bag-ong Tax Reform for Acceleration and Inclusion (TRAIN) sa administrasyon ni Presidente Rodrigo Duterte.
“Wa tay mahimo ana, para nako luoy man sad ang mga drayber, gamay ra og makwarta. Pero maayo sad nga patas-an ang sweldo para bahalag mosaka ang plite,” dugang ni Baya.
Si Ryan Benjamin Yu, chairman sa Citrasco, unang nipahibawo nga kon mapatuman ang excise tax sa fuel, mangayo usab sila og P6 nga umento sa pletihan sa PUJ.
Si Roger Ortega, 42, jeepney driver, nabalaka sa pagsaka unya sa presyo sa gasolina.
“Dili gyud na maayo. Unsa pa man amoa ana. Naglisod pa man gani mig pangita og pasahero”, matod ni Ortega.
Pabor siya sa pagpaumento sa pletihan aron matapakan ang matibhang sa pag-umento unya.
Nag-abang lang si Ortega sa jeep nga iyang gipamasaheroan ug nanghinaot nga kon mosaka ang presyo sa gasolina, umentohan usab ang pletihan. (Michelle Anne Obor ug Mary Diane Salasayo, USJ-R Interns)