KIDAPAWAN CITY - Nanghasi na sab ang mga miyembro sa Bangsamoro Islamic Freedom Fighters (BIFF) alas 9:30 sa gabii niadtong Miyerkules sa probinsiya sa North Cotabato.
Sa taho gikan sa 602nd Brigade, nasayran nga gisulong sa mga sakop BIFF ang detachment sa Philippine Army 7th Infantry Battalion didto sa Barangay Pagangan, Aleosan, sa maong probinsiya.
Apan mga sundalo ug mga sakop sa Citizen Armed Forces Geographical Unit (Cafgu) nga abtik nakabantay, dali sab dayong nakigsukliay og mga bala batok sa mga kaaway nga milungtad og 10 minutos.
Human sa maong gidugayon, miatras ang mga BIFF human nga migamit og 81mm mortar ug 90rr bazooka ang militar.
Walay naangol o napatay sa mga sundalo ug Cafgu samtang dili matino sa bahin sa BIFF nga giingong gipangulohan ni Kumander Nasria.
Nagpadayon ang combat clearing operation sa militar batok sa BIFF sa mga hilit nga dapit sa Aleosan.