IPAUBOS sa imbestigasyon sa Cebu City Police Office (CCPO) ang mga sakop sa Mabolo police station nga gipasanginlan nga nangilkil sa usa ka piryahan sa sitio Nivel Hills, Barangay Busay, siyudad sa Sugbo.
Human mabulgar sa media, ila kining gidakop.
Gimandoan sa Deputy City Director for Administration Supt. Artemio Ricabo ang Investigation and Detective Management Branch sa CCPO nga ipaubos sa imbestigasyon ang mga police sa Mabolo tungod sa reklamo nga nangayog sinima nga payola sa usa ka piryahan sa Barangay Busay.
Sa miaging buwan, gipaabot sa media ang reklamo nga nangayo og P3,000 ug usa ka sakong bugas humay matag semana ang mga pulis sa Mabolo bugti nga di sila dakpon.
Apan giingong nadak-an ra ang operator sanglit ginagmay lang ang ilang kinitaan sa matag gabii nga operation.
Pipila ka mga tuig ang nalalabay, nakuhaan og video ang pagpangayo og P 1,000 isip payola sa mga sakop sa Mobile Patrol Group matag gabii hinungdan nga dali nga giparelibohan ang maong mga pulis.
Ning tuiga, nireklamo na ang operator nga misaka ang gidemanda sa Mabolo police station ngadto sa P3,000.
Apan niadtong Disembre 29, gipangsakmit sa Mabolo police ang mga gamit sa piryahan tungod sa kalapasan sa Presidential Decree 1602 o Anti Gambling Law sanglit dunay pustahanay nga nahitabo sa piryahan.
Bisan pa man niini, kinahanglan nga dunay himuon nga imbestigasyon ang CCPO ug kon masuta nga dunay nahimong kalapasan ang maong mga pulis, mag-atubang kini og kasong administratiba.
“Atong i-charge administratively. Depende na sa atong city director kung unsa iyang ipataw base sa result sa investigation,” matod ni Ricabo.
Mismo si Sr. Supt. Joel Doria nimando nga panakpon ang sugal sa mga piryahan human makadawat og report nga gihimong gatasan sa mga pulis.
Gipasabot ni Ricabo nga tanang matang sa illegal nga sugal ilang gipangsikop bisan kon nakakuha sila og permit sa barangay.
Dugang sa police official nga kon masuta nga dunay illegal nga sugal sa piryahan, ila kining pang sakmiton lakip na ang naa nahimutang sa South Road Properties bisan kon naa kini permit gikan sa syudad sa Sugbo.
Gawas sa IDMB, ang City Internal Affairs Service mohimo na usab og linain nga imbestigasyon nunot sa nadawat nga kasayuran gikan sa mga sakop sa media.