KAADLAWON na ko nakabantay sa akong Facebook kabahin sa sunog sa Metro Ayala nga niulbo sa miaging gabii. Sama sa miaging mga sunog sa mga dagkong malls, di kini mapawong og dali.
Tuod man, karong nagsulat ko niining maong lindog, padayon gihapon ang pagkumbati sa atong mga bombero.
Di ko makalimot nga ikadaghan na naigo og sunog kining mga mall nga gipanag-iya sa mga Gaisano.
Bata-a pa nako niadtong nasunog ang White Gold House nga diha sa Osmeña Blvd. atbang sa kanhi Diamond Tower. Usa na kini ka parking lot karon.
Paglabay sa panahon, gitukod ang bag-ong White Gold diha sa North Reclamation Area. Apan nasunog gihapon kini.
Mas makahinumdum ko sa maong sunog kay naa man ko magtrabaho sa kanhi Newstime Daily nga niadtong tungora naa mag-opisina sa duol.
Sunod nga nasunog mao ang Gaisano South diha sa Lane sa dalan Colon. Dayon mao kini ang nahitabo sa Metro Ayala.
Di lang kita mo-speculate kon nganong ampay mokaon ang kayo og mall nga gipanag-iya sa pamilyang Gaisano. Tingale kay daghan lang gyud silag mga mall. Di man sab tinuod nga gisarado ang Metro Ayala kay nag-inventory sa wa pa masunog.
Maayo na lang kay di pareho sa mall sa Davao nga nasunog sab ug daghan kaayo ang nangamatay. Magpasalamat kita niana.
Ekipo
Ang ako na lang nga mas maayong mangandam ang atong kabomberohan sa ingon niining mga sunog edipisyo nga pipila ka andana unya wa kaayoy mga bintana aron makahungaw dayon ang kayo.
Sa sigi natong paminaw sa mga radio coverage man gud, atong nasabot nga naglisod ang kabomberohan tungod sa kabaga sa aso inig sulod nila sa edipisyo. Mao nga gigamit nila ang backhoe aron mabuslotan ang bongbong niini.
Unsa sab kaha ang atong kaandam kon mas taas pa sa unom ka andana ang maong nasunog nga building?
Naa ba kitay daghan aerial ladders? Naa bay helicopter ang kabomberohan aron mo-rescue og duna pananglit na-trap sa atop.
Maayo na lang gyud kay walay na-trap sa maong sunog. Atong panghinaot nga dili na sab mokatay pa ang sunog sa ubang bahin pa sa Ayala Commercial Center (ACC).
Santo Niño
Magpasalamat sab kita kang Senyor Santo Niño nga wala siya motugot nga dunay kinabuhi nga makalas niining maong hitabo. Hapit na ra ba gyud ang Pista sa Balaang Bata.
Ang ato lang masulti sa pagkakaron nga di man madayon ang gipalanohang RFID tickets diha sa sports center, dunay giandam karon nga mobile app nga i-anunsyo sunod semana.
(@anol_cebu sa Twitter)