MATOD pa sa kanta ni Freddie Aguilar nga ‘Tawanan mo ang yong problema’. Tinuod, gikinahanglan nga dili nato kaayo seryusohon ang atong problema nga makaapekto na og maayo sa atong panghuna-huna. Ang tanang problema adunay solusyon kon ang hingtungdan mangita lang usab og pamaagi nga masulbad niya ang iyang problema.
Unsa man kining kasagaran nga problema nga atong masugatan? Una, bahin sa relasyon sa uyab o ba kaha asawa. Ikaduha, kabahin sa pinansiyal. Nagka-problema kay dakog utang o ba kaha walay ikagasto. Ikatulo, kadtong mga napakyas sa ilang mga ambisyon o ba kaha nagka-problema sa ilang panarbaho. Ug ang ika-upat mao kadtong adunay gihambin nga balatian nga wala nay kaayuhan.
Alang niadtong nag-atubang ning maong matang sa problema daw nahugno na ang kalibutan alang kanila nga maoy hinungdan nga makahuna-huna na lang sila sa pagkutlo sa ilang kinabuhi. Depression ang kasagarang hinungdan kon ngano ang usa ka tawo makahuna-huna sa pagkutlo sa iyang kinabuhi.
Akong gihisgutan ang kabahin sa mga problema nunot niadtong nahitabo nga suway sa pagkutlo sa ilang kinabuhi gumikan sa problema sa relasyon. Usa ka lumoluyo sa likud GMA 7 sa Nivel Hills ang misuway paghikog pinaagi sa pagbubo og gasolina sa iyang lawas ug dayon giduslitan ang iyang kaugalingon. Maayo gani kay dihay nakakita ug nitabang nga mapawong ang kayo. Nadala ang biktima sa hospital apan namatay pagkasunod adlaw. Unsay problema? Gumikan kay nag-away sa iyang asawa.
Dayon dihay usa ka tinun-an ang niambak gikan sa fourth floor sa iyang eskuwelahan human mag-away sa iyang hinigugma. Maayo kay nabuhi ang biktima apan daghan bali sa lawas.
Kining maong mga sirkumstansiya angayan bang buhisan og kinabuhi? Sa habig sa lalaki, pagkadaghang babaye diha kon moabot man ang panahon nga dili na magkasinabot sa iyang uyab o asawa, aw, magbuwag god. Mao pod sa habig sa babaye. Hinuwaman lang kining atong kinabuhi ug ang Labaw’ng Makagagahum lamang ang adunay katungod sa pagkutlo niini. Tanang problema adunay kasulbaran. Kana maoy timan-i.
(bobbygnalzaro@gmail.com)