Luzano: 2018...ania ngata ti purosentayo a bungana?

NASAM-IT ngata wenno naalsem ken nasugpet kaskada napait ti intay purosen a bunga ti agdama a tawen – 2018? Nasapa pay a masungbatan, pards.

Mananamtayto no ania dayta a bunga babaen kadagiti pasamak nga intay masabat manipud ita. Ngem no dakayo ti inkam amaden...ania ti makunayo? Ala, agtextkayo laeng ta ...ehe, kunak la no addatayo iti radyo.

Padasentay ketdi a pugtuan dagiti mabalin nga ibunga ni 2018 tapno matemplatayo a naimbag ti awengna ta di ketdi agsilang kada agsintonado:
-o0o-
Rugiantayo ti agsukain babaen iti kaudian a lagip ni 2017. Kudos iti AO 28 ni Pres. Digong. Dakkel ti bimmabaan ti bilang dagiti naputukan (palibang ken armas) idi Paskua ken Baro a tawen. Mismo a ni Sec. Duque ti DOH ti nagsaludo iti addang ni Presidente.

Nupay adda latta dagiti sukir wenno subeg, ad-adu kadagiti kailiantayo ti nagtungpal wenno immannurot iti sinaguday ti order ni Digong.Pakabuklan na’ kabaelantayo met gayam ti agtulnog no kayatentayo, saan aya? So...di unay nadara ti pannakasarabo ti baro a tawen no maikumpara kadagiti naglabas a panawen.

Ti laeng mantsa ni 2017 ket dagiti nagsasaruno nga uram iti nagduduma a paset ti pagilian. Adu dagiti nag-Paskua ken nag-Baro a Tawen kadagiti bakwitan...naawananda iti taeng ken pagbiagan. Sapay koma ta babaen iti tulong ti gobyerno...in-inut a mapunas ti lamma dagita a kamalasan iti biag tapno bumangontayo manen iti likud dagita a pannubok.

-o0o-

Sakbay a nagpakada ni 2017...agkakawil dagiti kontrobersiya a nangmarka iti kagimongan. Kas koma ti phase-out kano dagiti daanen a PUVs – Jeep, Bus, uray trak kas kuna ti DOTR; di pagkikinnawatan dagiti nangangato nga opisyalestayo kas koma kada Sen. Trillanes ken kampo dagiti annak ni Pres. Duterte; ti pannakaibulgar dagiti nalabes kano a panaggastos kadagiti ahensiya ti gobyerno (PCSO) ken panaglablabes iti akem a nagresulta kadagiti sibakan wenno panangikkat ni Digong kadagiti bulok a kamatis iti administrasyonna; ti agtultuloy a tensiyon iti nagbaetan ti CPP-NDF-NPA ken gobyerno nga iti kaudian ket ti saan a panangawat a sigida ti Malakanyang iti wish weno kiddaw ni Joma Sison a pannakaitultuloy koma ti peace process; ken ti idandanagan ti kaaduan nga ibunganto ti baro a paglintegan iti panagbuwis...ta adu ngamin ti agkunkuna a daytay kano naikkat a buwis kadagiti mangmangged ket maibawi wenno subboten met laeng dagiti ngimmina a gagatangen ken serbisyo.

Dagita dagiti sumagmamano laeng ngem napapateg a ramen ti paspasungadentayo a bunganto ni 2018.

-o0o-

Serkantayon ti poder ni 2018. Nabusatan a sigida babaen kadagiti agkakadagsen a tema-pulitika ti ridaw daytoy baro a tawen. Iti pannakaisursurat daytoy nga espasyo...dipay imbutaktak ni Pres. Duterte no siasino ti mapagsarsaritaan nga opisyal ti gobyerno ti ikkatenna (kano) iti takem. Adu dagiti agpugpugto ngem natangken ti pangngeddeng ti presidente nga ipakaammonanto latta iti umno a panawen.

Adda pay nagpugto nga amangan kano ta ti maikkat ket adda pakainaiganna iti imbutaktak ni PCSO Board member Sandra Cam mainaig iti nagarbo kano a Christmas party.

Ngem kuna met ti pannakangiwat ti Palasyo a ni Sec. Harry Roque nga adda talek ni Pres. Duterte kadagita a tattao. So, awan dita ti atapda a maikkat.

Adda met agpugpugto nga amangan ta ti maikkat ket tay opisyal a kanayon kano nga awan iti opisinana ta mahilig a mapan agpakpakni iti ballasiw-taaw.

Adda pay atap a gapu kano iti sablay nga operasyon ti MRT ken nakaro latta a traffic dita NCR. Tay inatapda idi a maikkat gapu iti sablay a rebbengen koma ti Kustom...nupay adda iti kustudiya pay laeng ti Senado...inapointaran met ti presidente a kas maikadua a turayen ti OCD- Office of Civil Defense. Tsk tsk...timmawas sa ti pugtoyo, kabsat.

Sabagay, ditay pay ammo dagiti sumaganad a plano ti administrasyon.

Ditay unay agganat. No imper-aken ni Digong ti pangeddengna...addaytan. Sige, relaks latta pards.

-o0o-

Isingitko man biit ti adal a natawidko iti daydi lolok. Adda ngamin pakainaiganna iti panagur-uraytayo iti pangeddeng ni Pres. Duterte no sinno dayta a pulano wenno pulana nga ikkatenna.

Adda ngamin pangngarig idi daydi nasarewawwek ti utekna a lolok: tay kano am-ammona a sobra ti kinasadotna nga ultimo magawgaw-atnan a bunga ti bayabas ket dina pay laeng purosen. Inyeddana ketdi iti batog ti naluom a bunga ti bayabas sa NAGNGANGA.

Urayenna kano laengen ti bunga ti bayabas a matnag iti ngiwatna. Adda natnag nga agpayso. Bayabas? Saan...bunga ti NIYOG! Patay ni sadot! Ti adal...ti kinasadot ket putot ti utek a TANGA!

No mainaig iti matagtagiuray a pangeddeng ni Digong no sinno ti sibakenna nga opisyal....didanto makalisi iti pannusa gapu ta adda aramidda. Tay koma mas nadagdagsen pay ngem niyog ti mababtuog iti uloda tapno agnakemda.

Ngamin, kas tay kunadan...dikanto malisian ti saplit ta konsiyensiyam kasta met ti hustisya. Sige, apo Digong, karadikadem amin ida dagita a limatek kada tekka dita abaymo!
-o0o-
Maysa pay a kontrobersiya ti nangbusat kenni 2018. Daytoy ti malugluglog tatta nga isyu panggep iti NO-EL wenno No Election. Sus mayusep! Ta sinno manen ti nagkuna? Ket no ni met kano House Spkr. Pantaleon Alvarez?

Kastoy kano, ti kunana: no kas pangarigan kano ta agballigi ti maisaksakad a pannakasukat ti porma ti gobyerno para iti Federalismo...amangan kano ta saan a matuloy ti eleksiyon iti umay a tawen 2019.

Kayatna a sawen nga agdependar ti eleksiyon iti no ania ti pagtungpalan ti nakuna gakat nga adalen ken sangalen ti sibubukel a Kongreso – House ken Senate. Ngamin, kuna ni Alvarez a no kas pangarigan ta mapantayon iti porma ti gobyerno as Federal, masapul ti “transition government” ket no makalusot iti referendum babaen kadagiti umili ti plano a “federal form of government”...mas nasaysayaat kano a maipatungpal daytoy inton tawen 2022 a panagleppas ti termino dagiti amin a senador.

Innayon pay ni Alvarez a prayoridad ti Kamara ti gakat a federalism ita a tawen babaen iti pannaka-convene ti Kongreso kas Constituent assembly. He he...medyo adu manen kadagiti pulitiko (addaan plano para 2019) ti nakusen ti mugingda iti dayta a senaryo, saan ngata? Ala, relaks appomi a pulitikos ta kuna met ti Malakanyang...tuloy ti 2019 elections. Ayos!!!

-o0o-

Ngem ti maysa nga isyu nga intay suroten ita a tawen ket ti mapagsarsaritaan a TERM EXTENSION ni Pres. Duterte. Iti sidong ti porma a Federalismo...legal ngata ti extension? Ti sungbat ni Senate President Koko Pimentel: “Depends on the transitory provisions. And depends, too, on when we approve the new constitution. If 2019, then the next three years will be the transitory period. We can extend the president’s term.”

Ngem impaganetget ni Pimentel a ti panggepda ket para iti Federalismo a saan ketdi a para iti extension wenno pannakapaatiddog iti termino ti presidente.

So kadagitoy a panawen, kasla mapugpugtuanyo kadin nga adu ti mabalin nga ibunga ti 2018 nga intayto apiten. Urayentayo. Adios mi amor, ciao, mabalos!
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">



style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="4158864647">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph