Garcia: Malagwang-Pamanaliwa ring Pamipaulaga Tamu

“E ta mu darapat makatud uling atin tamung kebyasnan at kapantasan
nung e atin tamu kareta uling darapat tamung makatud.” ~ Aristotle

"Ing makabayung tau mipapakarok ya karing balang kasangkapan a peka-paulagan na. Balang nanabangnan na king upaya, balang agagamat na karing sikanan king kalikasan, balang maka-agam a dagdag king belwan, mipatunayang ating panganib, pauli ning e ya mitumbasan king timbang a nabang king pamisanak king sarili at king pamituntun king sarili.” ~ Lewis Mumford

“Kesa king lugud, lesa king salapi, kesa king kebantugan, dinan mu kung katutwan.” ~ Henry David Thoreau

“Ding kapanwalan mu magi lang pamisip mu’
Ding pamisip mu magi lang amanu mu,
Ding amanu mu magi lang dapat mu,
Ding dapat mu magi lang gawi mu,
Ding gawi mu magi lang pamipaulaga mu,
Ding pamipaulaga mu ilang maging dasan mu.” ~ Mahatma Gandhi”

“Ding bage mayayakit pangsaguli la mu;
Dapot ding bage e mayayakit pang-alang-angga la.” ~ II Corinthians, 4.1:18

*****

ALANG marok king magnasang ligaya. Ita ing tune parasan ning bye tamu ngan—ing ligaya. Makanyan man, ing paralan o ding paralan bang miras tamu king parasan tamu ing munye tagumpe kekatamu bang dasan iti king malagwa o malambat a panaun.

Ding pamipaulaga tamu karing mengalabasan a pilan mung banwa maragul a pamagbayu at miyalilan ing pamipaulaga king kayapan king pamipaulaga king makalabwad a tula, a bitasa namang pangsaguli mu—sinakurap mu mababating na. Balang tula o ligayang manibatan king nanu mang makalabwad a bage malagwang magigisan, mababating, makakalingwan at lilipas tambing denasan ta na.

King kasalungsungan dakal a kasangkapan a pane mibabayu at malagwa mu namang pagsawan tamu inya pin sa’t deng gagawang magbaliwas kareti e la patugut manaliling bayu dusuldit. Alimbawa, kapilan la pa linwal deng iPhone 9 at Galaxy S8 ati na namang iPhone X at Galaxy S9. Mekad keng mung makadwa iPhone XX at Galaxy SXX na naman ing ipalwal da.

O’t antita? Kasi deng tau saguli la mung sumawa o ala lang pikabsyan agyang nanu pang ibye mu karela. Nung malyari mu saliwan da ngan ing sablang buri da, kanan at inuman da ngan ing sablang buri da, pagawa lang mangaragul at mangamal a bale, e mu metung e mu adwa…maglakbe la karing sablang balen, lalawigan o bangsang buri da at itaya do ngan ding salapi’t pibandyan karing buri dang maging tau o asawa. Inya pin sapin-sapin ing kasangkapan da, kasna ya ing mula da karing saken da at tumpak-tumpak la ring asawa da subali keng bantug la pa.

Ing kutang, maligaya no man kaya? Mabsi no man kaya? Miganap no man kaya karing pagnasan da? Mekad salungat tamu at sabyan tamu maligaya’t mabsi la. Dapot nung gawan lang alimbawa ri Elvis Presley, Michael Jackson at Kurt Cobain—o’t mete lang malungkut at e mu rin pepatugut magpakaligaya o mantun ligaya?

Ing pakibat, kasi ing paulagan tamu keraklan kekatamu ila pin deng makalabwad a bage. Aliwa itamu ring katawan tamu nung e itamu ring kaladwang pangsamantalang makatuknang karing katawan tamu. E ta sukat paulagan ing makalabwad a ligaya.

*****

Dake Talabaldugan:

1. kináng – (palagyu) kilag, kintab, kislap, ningning, luningning. English–luster, brilliance, effulgence, shininess. Alimbawa king pamangamit: “Balang lelangan ating sariling likas a kinang anti karing batwin inya e ta la dapat lalatyan ninu man.”

2. kindát – (palagyu) pyak ning metung a mata anting pabirung pamanatu o pasaring king pibuburyan, kurap, pyak . English–wink (of the eye). Alimbawa king pamangamit: “Misan ne pa ikit ing paglolwan na, uyta kapalsinta na ne, ikwa n’ya mu keng metung a kindat.”

3. kindáy/kindé – (palagyu) kilag, kinding, kending, kembut, giri. English–contrived gait; strutting. Alimbawa king pamangamit: “Likas na ata ing kinde da ring kababaynan anting panggayuma karing mata ding kalalakyan.”

4. kindíng – (palagyu) kinding, kinde, kending, kembut, giri. English–exaggerated hip movements, esp. of women. Alimbawa king pamangamit: “Agyang e da pigagawan deng babai balang lumakad la ating kinding.”

5. kinis, kakinisan – (palagyu) linatnat, lingatngat. English–smoothness, fineness, polish. Alimbawa king pamangamit: “Mengari ya keng balat ning bingut ingbalat nang Osang inya e mu agyung e mipabalikid kaya neng lalabas ya.”

*****

PAMANGAPAMPANGAN: Mapanisig la reng Kapampangan. Sisig. Ala man atang “sisig” kareng aliwang amanu. Ala ya keng English, o agyang keng Tagalug o aliwang amanu. Kebantug tamu ing sisig. Mangabaldugan yang pamamangan king nanu man kabang sagiwa ya. Maralas a sisisigan tamu ya pin deng bungang tanaman a maslam. Mangga, santul, sampaluk, kamyas, papayang mura at aliwa pang tinakas king panalala king penandit ayni. Ing gawi tamung tiltilan—asin, baguk, o misan patis. Nung alang tiltilan, kulang ya ing pamanisig mengari king nung alang nasi e ya ganap ing pamamangan tamu. Ing metung a sisti kareng manisig ya pin ing “Kakagli ka, o’t manisig ka?” Kasi pin naman, deng kakagli mailig la keng sisisigang maslam. O, mekad, mengayat ka wawa kanyan, abe. Tara, manisig ta na!

*****

Agkatan da kang mambag o midake nanu mang Kapampangan a kawatasan, sanese, sisti, kasuryan o nanu mang dikil king Kapampangan. Nanu mang kutang o sisti dikil king Kapampangan a misulat king Kapisik, malyaring ikutang o malinawan king talasulat. Pakiparala king email address, garciakragi@yahoo.com. E ne pu makibat keng text ing Kapisik uling megamit ya lagyu keng kapamiraytan. Nung karapatdapat ya’t makayagpang king dalerayang tuntunang Kapisik, masa kang mirinang kapakibatan at milimbag ya sanu man kareng tutuking dangka ning Kapisik. Ipisik me pamu, abe!
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">



style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="4158864647">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph