UMOLON karong adlawa ang 4-man special investigating team nga mosusi sa sunog sa Metro Ayala nga nilungtad og dul-an 40 ka oras.
Kagahapon sa alas 12:45 sa udto, gideklarar na nga under control ang sunog.
Base sa inisyal nga danyos, moabot kini sa P100 milyones apan, matod ni Bureau of Fire Protection (BFP) 7 regional director Sr. Supt. Samuel Tadeo, nga maghuwat pa sila sa affidavit of loss sa Metro Retail Stores Group Inc., (MRSGI) aron makuha nila ang insakto nga danyos sa sunog.
Dugang niya, posible nga mosaka o moubos ang pagbanabana sa danyos.
Matod ni Supt. Ronaldo Orbeta, assistant regional director for operations sa BFP 7, nga karong adlawa magsugod ang special investigating team nga mosusi sa sunog sa Metro Ayala.
Usa sa kuhaon nila ang mga pamahayag sa mga empleyado nga posibleng makahatag nila og impormasyon sa rason sa sunog.
Gipahibawo ni Orbeta sa Superbalita Cebu nga magbase ang imbestigasyon sa danyos sa sunog.
Kon moabot sa P50 milyones pataas ang danyos, ang national headquarters sa BFP na ang mosusi ug mohimo sa imbestigasyon.
Hinuon giklaro niini nga inisyal nga pakisusi ang himuon sa special investigating team diin gikan kini sa city, province ug sa BFP 7.
Si Tadeo sa iyang bahin nipasabot nga niabot sa dul-an 40 ka oras sa wala pa nila hingpit nga nadeklarar ang fire under control tungod kay gawas sa sukip ang edipisyo sa building, daghan kini og plastic material ug tela nga dali masunog.
Kagahapon sa buntag dihang gisulod sa BFP 7 special rescue unit ang mall aron masuta kon naa pa’y baga o kayo.
Matod ni Sr. Insp. Paul Patrick Laude, hepe sa SRU, nga wala na’y kayo ang sulod apan usa ning mga lansang ug stante nga nasunog nga nakabuslot sa ilang hose samtang nagpasirit sila sa sulod.
Dugang ni Laude nga atol sa overhauling niabiso ang safety engineers sa mall nga huyang na ang ibabaw nga bahin sa mall mao nga kinahanglan na sila mogawas kay posible nga mahugno kini bisan unsang orasa.
Sa mga hulagway nga kuha sa BFP 7 personnel sulod sa mall, makita nga niabot ang tubig sulod sa mall.
Kagahapon, cooling nalang ang gihimo sa kabomberohan kini aron masiguro nga hingpit na nga ma-fire out ang sunog.
Itandi usab niadtong Sabado, wala na kaayo ang baga nga aso nga nihabol sa pipila ka dapit palibot sa Ayala.
Ang Ayala Center Cebu sa ilang bahin nianunsiyo pinaagi sa ilang pamahayag nga sirado una ang mall hangtod “we have done our full systems check.”
Matod ni Tadeo nga luwas na hinuon ang duol nga mga establisyemento ilabi na ang Ayala Mall kay under control na ang sunog.
Si Atty. Vince Tomaneng, tigpamaba sa MRSGI, nagpabilin ang pasalig nga wala’y trabahante sa Metro Ayala ang mawagtangan og trabaho.
“All regular and probee employees will be absorbed and won’t be displaced,” si Tomaneng sa text message niini sa Superbalita Cebu.
Samtang sa traffic advisory sa Cebu Business Park, abli ilang mga dalan gawas sa Bohol St. ug bahin sa Luzon Ave.
“Bohol St. will have limited access for building occupants of Cebu I.T. Tower, Ayala Center Cebu Tower and FLB Tower,” dugang niya.
Samtang abli ang ibabaw nga bahin sa PUV terminal sa Ayala.