ASA mo mangitag lalawigan diin dunay na-gobernador kay namatay ang nakadaog nga gobernador ug bise gobernador? Apan iyang gisayang ang kahigayonan ug karon, nagpas-an kini siya og daghang mga kaso.
Niadtong 2010, gisubli sa pagpili nga gobernador sa Negros Oriental si Dr. Emilio Macias II. Apan namatay siya tungod sa sakit nga cancer sa wa pa siya makapanumpa sa katungdanan. Mao nga pagka June 30, ang napili nga bise gobernador nga si Agustin Perdices mao’y nanumpa isip gobernador sa lalawigan. Ang number one nga Board Member nga si Roel Degamo nahimo nga bise gobernador.
Pagka Enero 2011, si Perdices namatay usab sa sakit nga cancer. Wa damha, nahimong gobernador si Roel Degamo.
Daw mando sa Kahitas-an. Apan giusikan ni Gob. Degamo ang kahigayonan.
Niadtong Disyembre 2011, niagi ang bagyong Sendong sa Negros ug ang lalawigan nahiagom sa dakong kadaot. Nausban usab kini sa dakong linog niadtong Pebrero 2012. Nangayo si Degamo ug P967 milyones alang sa mga river control project ug uban pang mga nadaut nga taytayan ug kadalanan.
Nipadadala ang DBM og P480.7 milyones sa Hunyo 5, 2012. Apan gibawi sa DBM ang Special Allotment Release Order (SARO) pagka Hunyo 19, kay duna pay mga papeles nga wala makumpleto. Gimandoan ang Probinsiya sa pag-uli sa kwarta sa Manila.
Imbes iuli nila ang kwarta, ila kining gigamit. Mao kini ang usa sa hinungdan sa mga nagpusot-pusot karon nga kaso nga gi-atubang ni Degamo. Tungod niining kaso, gi-dismiss siya sa Ombudsman sa ikatulo na karon nga higayon.
Apan si Degamo nakalingkawas sa duha ka mga dismissal order pinaagi sa Court of Appeals. Ang CA dinhi sa Sugbo nibali sa desisyon sa Ombudsman pinaagi sa gitawag og Aguinaldo Doctrine. Ubos niining maong pamalaod, ang mga salang administratibo sa usa ka elected official mapasaylo kung sila mapili pag-usab.
Gibasura na sa Korte Suprema kining maong Aguinaldo Doctrine niadtong Nobyembre 2015 sa kaso ni Makati Mayor Junjun Binay. Apan mao gihapon kini ang dangpanan sa mga nakasalang mga politiko bisan karon tungod kay ang mga illegal nga mga buhat gihimo sa wa pa ang Nobiyembre 2015.
Niadtong Disyembre, ang Ombudsman nipanakaog sa ikatulong dismissal order ni Degamo tungod sa kaso nga paggasto og P10 milyones nga kuno Intelligence Funds niadtong 2013, bisan kon kini wala sa budget.
Sa Oktubre, giangkon ni Degamo ang maong sala sa dihang giuli niya ang P10 milyones. Upat ka tuig ang milabay apan P10 milyones ra gihapon ang gi-uli.
Kon sa bangko pa ka mohulam niining maong kantidad, ang imong ibayad human sa upat ka tuig hapit na mo-doble. Pasaylo-on kaha siya sa Court of Appeals?
Hatagan kaha si Degamo sa Court of Appeals ug ikatulo nga TRO o Injunction? (@anol_cebu sa Twitter)