ANG dakong sunog nga nahitabo sa Metro Ayala mall nga gikumbati sa mga bombero sulod sa 40 oras maoy nagsuway sa kapabilidad sa atong mga firefighters sa pagkumbati sa kayo sa mga tag-as kaayo nga buildings. Nganong wala man dayon mapawong sa atong mga bombero ug sa ubang fire volunteers ang kayo sa dihang miulbo kini niadtong Biyernes sa gabii? Domingo na nga gideklarar sa fire department mga “under control” ang kayo.
Walay lalis aduna kitay mga maisog ug kursunada nga mga bombero nga andam ug tagana nga mohalad sa ilang kinabuhi, apan mag-unsa man ang ilang abilidad kon kuwang sila sa mga ekipos nga magamit sama sa fire breathing apparatus, fire ladder ug conditioned firetrucks.
Unsa may nahitabo sulod sa 40 ka oras nga nagkigkumbati ang mga bombero sa kayo nga didto lang miigo sa Metro Ayala mall? Wala dayon makasulod sa building ang mga bombero gumikan sa grabeng nagpuot nga aso, walay makasudlan diin sila angayan nga mo-posisyon aron makapasirit og tubig. Ang ilang fire ladder naka-bot kaha ngadto sa third floor diin gidudahan nga nagsugod ang kayo.
Daghang kakuwangan ang atong mga bombero nga mga kahimanan. Giguba pa sa mga bombero ang bongbong sa building diin nag-omido ang kayo aron makapasulod sila sa ilang hose. Diha ra sa gawas nga bahin nakapasirit ang bombero og tubig apan ang kayo nagkadako didto sa sulod.
Kon naglisud ang mga bombero sa pagsanta sa kayo sa unom ka andana nga building sa Metro Ayala, unsa na kaha kon motumaw ang sunod nianang mga 50-floor buildings. Wala nay fire ladder nga magamit ang fire department nga makaabot ana. Aduna na tuod nay mga sprinkler system ang maong mga buildings apan mo-obra o mosaler kaha na kon adunay sunog? Ang Ayala Mall naa man kuno nay sprinkler apan sa pagkasunog nakatabang ba? Panahon na siguro nga hinuktukan sa atong national government kining panginahanglan sa atong kabomberohan. (bobbygnalzaro@gmail.com)