HUMAN sa “The Revenger” ni Vice Ganda, dunay laing comedy movie karon ang Star Cinema isip opening salvo nila sa Year of the Earth Dog.
Ang “Ang Dalawang Mrs. Reyes” gibituonan nilang Judy Ann Santos ug Angelica Panganiban nga nagsabot nga manimawos sa ilang mga bana human sila giilad nga abi nila mga lalaki, mga bading diayng pak-an.
Angayan kaayo magbinayot silang Joross Gamboa ug JC de Vera nga nidula sa papel nga mga bana nilang Juday ug Angelica sa pelikula. Kauban sad dinhi silang Gladys Reyes ug Carmi Martin nga nakapadugang sa kaalegre.
Showing na ni karong Enero 17, 2018. Manan-aw ta kay basin sunod buwan momahal na ang pulta sa mga sinehan tungod sa excise tax!
John Lloyd
Maora ra og wala mo-leave sa showbiz si John Lloyd Cruz kay halos kada adlaw maoy sumsoman sa social media ang ilang relasyon ni Ellen Adarna.
The more nga dii sila motingog, the more nga pistahan sila sa showbiz. Mas maayo pa mo-isyu na sila og official statement aron once and for all mahilum na ang mga espekulasyon bahin nila.
I’m sure, sooner or later motingog ra gihapon ni sila. Ang pangutana kon duna pa ba’y balikan nga career, not so much with Ellen, but si John Lloyd human aning tanang kontrobersiya?
San Diego
First time ko nakabisita sa dance studio sa San Diego Dance Company nga naa likod sa dyHP sa may Capitol site. Ang ilang studio naa sulod sa 4-storey building nga gipanag-iya mismo sa magtiayong Val ug Ofelia San Diego nga nagselebrar diay sa ilang 30th wedding anniversary niadtong Dec. 31.
Matod sa CEO ug choreographer nga si Val nga sukad nasunog ang ilang ancestral house sa Carcar niadtong 2002 mao na ni nahimo nilang dance studio ug pinuy-anan.
Sama sa miaging katuigan, ang San Diego mosayaw isip guest dancers sa Sinulog agi’g pasalamat sa mga grasya nilang nadawat gikan sa milagrusong bata.
Ugma, basaha kon giunsa pagtandog ni Senyor Santo Nino ang kinabuhi ni Val sa atong Q and A niya sa Ssssuper Ka!
Promo Queen
Unang party nga atong tambungan sa 2018 ang birthday ni Ms. Josie S. Pereyra nga ipahigayon karong gabii sa usa ka dakong hotel.
Basin traffic na pud, mo-greet na lang ko daan og Happy Birthday, Promo Queen! Cheers!