HUMAN nga nakitang posibleng mahugno ang cooling tower sa Metro Ayala ngadto sa main Ayala Mall, di pa morekomendar ang Bureau of Fire Protection (BFP) 7 nga ablihan ang mall sa publiko.
Kini nakita sa kabomberohan atol sa ocular inspection nga gihimo sa BFP 7 nga gipangulohan ni Fire Sr. Supt. Samuel Tadeo inubanan sa mga representante sa Metro ug sa Ayala mall management.
Gusto ni Tadeo nga matangtang ang cooling tower sa Metro Ayala nga nagdahirig na paingon sa Ayala Mall.
Aduna kini’y gibug-aton nga 60 tonelada.
“Ni-recommend natin sa Ayala na wag muna mag open kasi pwedeng bumagsak yung itaas. Pagbagsak maaring matamaan yung mall nila. Sixty tons ang bigat ng cooling tower and nag-install na sila ng cranes para i-pull out yun. Unahin natin ang safety ng tao kasi visible na nakatagilid talaga siya,” pasabot ni Tadeo.
Atol usab sa ilang gihimo nga pagsusi, bisan og wa nalakip sa pagkasunog ang 2nd level ug ground floor, grabe gihapong kadaot ang naangkon niini human sa grabeng pagpasirit og tubig ngadto sa lugar.
“Nag-ocular kanina (gahapon) taga Metro and Ayala, tiningnan lang namin yung damage talaga. Nakita ang ground floor, hindi naman nasunog pero water damage, sirang-sira, basa na, yung kisame, di na makipanibangan.”
Nakita usab sa BFP 7 nga gikinahanglan nga gub-on ang tibuok edipisyo sa Metro Ayala.
Tungod niini posible nga madugay-dugayan pa ang pag-abli sa ubang mga tindahan sa Ayala mall.
Kagahapon usab gipatawag na ang pipila sa mga kawani sa Metro aron ipaubos sa questioning aron pagtabang sa gihimong inbestigasyon sa kabomberohan kon unsa gyud ang hinungdan sa sunog.
Karong adlawa magpadayon ang pagkuha sa mga affidavit diin ang representante na usab sa Ayala Mall ang pangutan-on.
Samtang sa gihimong padayong pagsusi, giangkon ni Tadeo nga posibleng motaas pa ang balor sa danyos sa sunog, human usab nga di lang ang Metro Gaisano ang naapektuhan.