ANG 21 Anyos nga tinun-an sa Cebu Eastern College pasakaan og kaso sa kapulisan aron motagam sa iyang paggama-gama og estorya nga siya gidagit sa lima ka mga tawo.
Matod ni Chief Inspector Jacinto Mandal, hepe sa Carbon police station, nga ang ilang pagpasaka og kaso gitumong aron di kini sundon ni bisan kinsa,diin ang kapulisan na hinuon samtang nakapahadlok usab sa publiko.
Sa buhatan sa Carbon police station gisukit-sukit ang 21 anyos nga tinun-an kon unsa ka tinuod ang iyang pasangil nga gidagit siya sa lima ka mga tawo ug dinhi na kini mitug-an nga di tinuod ang tanan.
Matod ni Mandal nga sa ilang gihimo nga pagsukitsukit, kini niangkon ang tinun-an nga nakahimo siya sa pagpamakak tungod sa iyang utang sa tunghaan nga iyang gialagaran nga mobalor og P4,000 nga halin sa libro.
Na-pressure siya sanglit niadtong miaging Biyernes gipaninglan na siya sa magtutudlo kon asa na ang maong kantidad nga maoy hinungdan nga naglibog na siya unsay iyang buhaton.
Sa una pa lang, matod ni Mandal nga atol sa ilang pagsusi sa dapit diin didto giingong gidagit ang tinun-an, way makatug-an nga dunay pagpanagit sa babaye ug way kuha sa CCTV camera sa mao nga hitabo.
Tungod niini nagtuo ang kapulisan nga hinimo-himo lang sa dalaga ang pagpanagit.
Nihimo dayon sila og back ground investigation sa mga classmate ug mga nakaila kaniya sa CEC ug nasuta nga duna kini problema sa kwarta.
“During sa atong investigation, atong nahibaw-an nga naa siyay problema mahitungod sa financial nga aspeto nga naa siyay kwarta nga gi entrust sa iyang maestra, iyang dean worth P4,000 nga halin daw na sa libro sa eskwelahan ug wala na siya maka remit,” matod ni Mandal.
Di usab tinuod ang gi-text niini nga gisakay siya sa itom nga van nga dunay plate number PMQ 128 ug iya ra kini nga mugna-mugna.
Nag-selfie selfie ra
Napalgan ang dalaga sa Jubay, Liloan pasado alas 8 sa miaging gabii human siya makit-i sa mga residente sa usa ka abandonadong balay sa sitio Pamotongan.
Ilang gipahibawo ang mga pulis sa lungsod sa Liloan.
Dali nga niresponde sila si Mandal ug ang hepe sa Investigation and Detective Management Branch sa Cebu City Police Office uban ang tulo ka igsuon niini aron ipaubos sa imbestigasyon.
Gipaubos usab kini sa medical examination nunot sa unang pangangkon niini nga gibun-og siya sa mga midagit kaniya apan ang resulta negatibo sa bun-og ang iyang kalawasan.
Ang iyang cellphone gikuha sa Carbon police aron mahiling.
Nasuta nga duna siyay mga hulagway nga nag selfie sa barangay Jubay nga nagmatuod nga wa siya dagita.
Ang iyang mga igsuon nangayo og pasaylo sa kapulisan sa kahasol nga gihimo sa ilang manghod apan matod ni Mandal nga ila gyud nga pasakaan og kasong kriminal ang tinun-an.
Ang dalaga kasamtangan lang una nga gikustodiya sa iyang mga ginikanan nga naabot sa syudad sa Sugbo kagahapon sa kaadlawon gikan sa Hilongos, lalawigan sa Leyte human masayod sa nahitabo sa ilang anak.
Gikustodiya na usab sa Carbon police station ang cellphone ug ang iyang tablet.
Way kidnaper
Ang hepe sa kapulisan sa Central Visayas mipaniguro sa publiko nga wala pay nakasulod nga grupo sa mga kidnapper dinhi ug pabiling luwas ang Sugbo niining matang sa mga kriminal.
Awhag sa kapulisan ngadto sa publiko nga di usab dayon motuo kon aduna silay mabasahan sa social media ug ang labing maayo nga di dayon ipakatap ang maong kasayuran nga wa pay kasigurohan aron di makahatag og kahadlok sa katawhan.