COTABATO CITY - Misaka na ang ihap sa mga napatay ug naangol sa katag-katag nga panag-engkwentro sa probinsiya sa Maguindanao.
Pinaka-ulahing sinukliay og mga bala sa militar ug mga armadong grupo natigayon alas 4:00 sa hapon niadtong adlaw nga Lunes.
Giila ang mga napatay sa mga miyembro sa Bangsamoro Islamic Freedom Fighters (BIFF-ISIS-Inspired Group) sila Buna Awba, Mando Guiamal, Mokamad Sagkupan, Roy Alik, alyas Salah, Abu Omar, Magui Datem, Mhads Mangibra, Aladin Rajah Pandalat, ug Fahad Tungao.
Naangol sab sa terorista nga BIFF sila Daryl Mando ug Theng Mando.
Narekober sa mga napatay nga BIFF ang mga tag-as nga klase ug mga improvised explosive device (IED).
Sa taho sa Intelligence Unit (S2) sa 601st Infantry Brigade sa Philippine Army, naka-engkwentro sa militar ug mga Cafgu ang mga rebelde sa Barangay Kobintog Datu Unsay, Maguindanao.
Milungtad sa usa ka oras og tunga ang sinukliay sa mga bala tali sa duha ka pundok.
Miatras ang BIFF, nga gipangulohan ni Kumander Bungos, sa diha nga namomba sa ilang posisyon ang duha ka Agusta 109 attack helicopter gunship sa Philippine Air Force ug mortar shelling sa ground force sa mga sundalo.
Sa kasamtangan, gipalig-on pa sa Joint Task Force Central sa militar ang paglutos sa BIFF sa probinsiya sa Maguindanao.