MALITA, Davao Occidental - Nibalik na sa normal ang dagan sa trapiko human temporaryong gisirad-an sa probinsya ang tulay sa Barangay Lais niadtong Martes sa hapon.
Nahugmak ang pikas tampi sa maong tulay human mikusog ang tubig tungod sa walay puas nga pag-uwan niadtong adlawa.
Daling nangayo og responde ang mga sakop sa Provincial Disaster Risk Reduction and Management Council (PDRRMC) ngadto sa buhatan sa Department of Public Works and Highways (DPWH).
Gibutyag ni Harry Camoro nga wa nila paagia ang mga sakyanan sa lugar human nga nahimong delikado ang maong tulay.
Apan, si Camoro nitataw nga gilihok dayon sa mga personahe sa DPWH ang pag-ayo sa tulay.
Nagpabiling naka-alerto ang PDRRMC tungod kay padayong nasinati sa probinsya sa ang daut nga panahon.
Sumala sa PDRRMC nga apektado sa localized thunderstorm ang lalawigan mao nga ilang gi-alerto ang mga molupyo daplin sa kasapaan ug kabukiran kay hayan mahitabo ang landslide tungod sa uwan.