ANG akong pagkamahiligon sa pagpaminaw sa mga tulumanon sa radyo sukad niadtong bata pa ko didto sa akong yutang natawhan sa Dipolog City labi pa sa mga drama maoy usa sa mga nakapa-aghat kanako nga mosulod sa industriya sa pagpanibya mga 37 ka tuig na nang nakalabay. Mikuha ako sa kursong Bachelor of Arts in Mass Communication (Masscom) didto sa Ateneo de Zamboanga niadtong 1980. Samtang nagtungha, nagtrabaho na usab ako sa radio station dxRZ sa UMBN-Radio Mindanao Network sa Zamboanga City.
Niadtong mga dekada 60 ug 70, bugtong ang dyCB sa karaang ABS-CBN ang radio station dinhi sa Sugbo nga mabati didto sa Mindanao. Pagdeklarar sa Martial Law niadtong 1972, kalit lang nawagtang ang maong sibyaanan kay gipasirad-an man ni Marcos ang tanang media outlets.
Pipila ka buwan human madeklarar ang Martial Law, mitingog na usab ang frequency sa dyCB apan nahimo na kining dyDY ubos sa Banahaw Broadcasting Corp. (BBC).
Didto ako unang makadungog sa tingog ni Tony Rabanes nga usa sa mga staff announcer sa dyDY uban nila ni Manny Delos Santos Rabacal, Roger Solante, Eddie Abellana. Gitawag sila og “The Big Four.” Diha usab si Larry Abelgas. Si Ginoong Rabacal na lang ang bugtong buhi sa ilang grupo. Usa sa akong nahinumduman nga gidala ni Tony mao ang papel ni Bobby sa drama nga “Anak” nga sinuwat ni Rafael Indab Tortor. Estorya to sa anak nga nalulong sa drugas. Ang sikat nga kanta ni Freddie Aguilar nga “Anak” maoy gigamit nga theme song.
Mibalhin ni Tony Rabanes sa dyHP ug misikat og maayo sa dihang siya ang nagdala sa papel ni Kumander Cobra sa dramamg “Gabii na Kumander” nga sinuwat ni Jun Bacalao. Niadtong 1987, nagka-uban ug suod kami ni Tony sa dyMF Bombo Radyo uban sa mga bangiitan ug inila nga mga dramatorgo.
Daghan kami og dili makalimtan nga mga kasinatian. Apan karon mibalik na siya sa sabakan sa atong Magbubuhat sa pangidaron nga 77. Adios, Kumander Cobra. Miabot na ang kagabhion alang kanimo. (bobbygnalzaro@gmail.com)