DAVAO DEL SUR - Gihugtan na sa kapulisan lukop sa probinsiya ang seguridad ug gipalapdan ang intelligence monitoring human giingong aduna nay nakasulod nga mga langyaw nga terorista sa Southern Mindanao.
Unang gipabuhagay ni Defense Secretary Delfin Lorenzana, nga nagagikan ang taho sa mga nasud Indonesia ug Malaysia.
Apan sumala ni Senior Supt. Samuel Gadingan nga kanunay nang nakaalerto ang tanang istasyon sa probinsiya sanglit padayong anaa ang hulga sa mga rebeldeng New People's Army (NPA).
Samtang gisulti ni Philippine Army Lieutenant General Rolando Bautista nga di pa nila masulti ang papel sa mga langyaw ngadto sa nahibiling local terrorist group.
Aminado ang militar nga adunay hulga nga matukod ang mga bag-ong henerasyon sa mga terorista.
Gibantayan sab sa militar ug kapulisan ang posibleng mahitabong recruitment sa mga local terrorist group.