Nalzaro: Magsilbing leksiyon

HUMAN miulbo ang sunog sa Metro Ayala mall, mohingusog na ang Bureau of Fire Protection (BFP) sa pagpahigayon og inspeksyon sa tanang mga edipisyo labi pa ang nga high-rise buidlings kon kompleto ba sa ilang fire safety requirements. Ubos sa Building Code, ang mga edispisyo nga mosobra sa upat ka mga andana nagkinahanglan na kini butangan og sprinkler system. Kay maglisod ang kabomberohan sa pagpakgang sa kayo gumikan sa kataas. Walay aerial ladder nga taas ang bombero.

Gumikan gihapon sa maong kasinatian sa Metro Ayala, diin miabot og 60 oras ang pagpakigkumbati sa mga bombero sa kayo, mimando ang “kanhi laos nga pulitiko” nga ipahunong una ang pag-process sa mga permit applications sa mga high-rise buildings hangtod nga mapangitaan og solusyon ang mga problema sa kabomberohan sa pagpakgang sa kayo sa tag-as nga buildings.

Mahulog lagi kini sa panultihon nga “dili ta manguros kon dili kita ma-igo sa kilat.” Ang nahitabo sa Metro Ayala magsilbi nga “wake up call” o leksiyon sa atong lokal nga mga opisyal ug sa fire department. Ako nang giingon sa nangagi natong lindog nga aduna kitay mga isog ug kursunada nga mga bombero nga andam ug tagana nga mohalad sa ilang kinabuhi aron lang pagtamud sa ilang propisyon, apan mag-unsa man sila kon walay mga firefighting apparatus nga magamit.

Karon nasuta nga ang kakulangan sa mga bombero. Kulang ang ilang breathing apparatus, aerial ladder, mga ekipos pagbuak og semento ug dili kondisyon nga mga firetrucks. Karon nga kuwang gyud diay ang atong mga bombero, unsa may mahimo sa atong lokal nga kagamhanan ug sa national government labi pa sa Department of Interior and Local Governments (DILG) diin ubos ang BFP? Mo-ingon na pod sila nga walay budget?

Dili baya basta-basta isalindot kining maong problema kay apil man kini sa atong ekonomiya. Ngano man? Nag­hisgot kita og patigayon o investment. Kinsa man ang ganahan nga mo-invest ug magtukod og mga tag-as kaayo nga buildings kon walay proteksiyon batok sa sunog?

(bobbygnalzaro@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph