USA sa mga atraksyon nga gipasigarbo sa lungsod sa Dalaguete mao ang Kandungaw Peak sa Barangay Maloray, habagatang Sugbo nga haom alang sa mahiligon og trekking.
Di tiaw ang pagsaka ug pagkanaug sa peak kay masukod ang imong paglahutay ug kalig-on sa imong mga tuhod.
Sa di pa magsugod ang trekking, kinahanglan magparehistro sa receiving area sa Barangay Maloray diin nahimutang ang tiilan sa peak duol sa barangay road.
Gikan sa registration area, magsugod ang challenge sa unang bahin sa trekking agi sa sementado nga hagdaanan nga moabot sa 194 ka dagkong mga ang-ang.
Sa pagpadung sa ibabaw, kutas ug kinahanglan mag-amping kay dunay bahin sa dan nga lisod agian, dangog, lapok, kabatuan, kasagbutan, ug habog nga pangpang.
Mosugat usab sa imong panan-aw ang mabulokon nga wild flowers, tag-as ug dagkong kakahoyan, rock formations uban sa tingog sa mga langgam, ug bugnaw nga hangin.
Gibana-bana nga 45 minutos ang pagbaktas paingon sa ibabaw sa Kandungaw Peak o mag-agad sa kapaspas sa inyong paglakaw.
Laing gatos kapin ka mga ang-ang sa sementado gihapon nga hagdanan ang imong subayon kon duol na ka sa ibabaw diin may gibutang usab nga pisi nga magunitan padung sa taas.
Pipila lang ka mga balay ang malabyan padung sa peak.
Sa dayong abot sa ibabaw, makita ang mga bato nga daw porma og ganghaan.
Gitawag kini sa lokal nga mga molupyo nga Gawang-Gawang nga nagpasabot og “entrance” o “gate.”
Inig abot sa labing ibabaw sa Kandungaw Peak, malantaw ang Lovers’ Peak, Sunset Peak, ug Taransiera Peak.
May pasilunganan alang sa mga bisita nga gusto mopahuway ug may gipabarog nga bandera sa Pilipinas isip marker sa ibabaw.
Si Maloray Barangay Kapitan Bonifacio Tangpos niasoy nga matod sa ilang katigulangan anha mag-abot sa Taransiera Peak ang mga maninda og lagutmon gikan sa Dalaguete ug ang mga maninda og isda gikan sa silingang lungsod sa Badian. Pahuwayanan usab ang dapit sa mga mag-uuma nga gikan namaol.
Samtang, sa Sunset Peak, nindot tan-awon ang pagsilang sa adlaw dapit sa Badian.
Sa Lovers’ Peak, may bato nga daw sama sa porma og kasingkasing.
Suma ni Tangpos nga sa panahon sa ikaduhang gubat sa kalibutan, sa maong lugar naumol ang pagminahalay sa katiguwangan.
Moabot sa 945 metros above sea level ang gitas-on sa Kandungaw Peak.
Sa labing ibabaw niini, mabihag ka sa katahom sa panoramic view sa ubos gikan sa imong nahimutangan sa taas. Malantaw usab ang silingang lalawigan sa Bohol sa walang bahin kon mag-atubang sa flag ug probinsya sa Negros Oriental sa tuo.
Tungod sa kataas sa imong lokasyon, usahay motabon ang mga gabon sa talan-awon ug modasmag ang kusog ug bugnaw nga hangin.
Di malikayan nga mangurog ang imong mga tuhod ug bation nga mura kag suyupon sa ubos tungod sa kahabog sa imong nahimutangan.
Alang sa mga buhis buhay nga selfies, kinahanglan nga mag-amping kay titip ang dapit ug batuon diin delikado nga ikaw mahagbong sa ubos.
Sa ubos sa Kandungaw Peak, may duha ka mga langob diin mahimo mosud ang mga turista ug makita ang buhi nga stalactites ug stalagmites.
Apan gidili ang pagsud sa mga langob sa udtong tutok o alas 12 sa udto.
Suma ni Tangpos nga dihay higayon may nakuha nga hulagway sa katingalahan nga nawong sa usa ka babaye nga nagputi og sinina.
Ang kapitan nidugang nga hilan ang lugar kay niadtong unang panahon hulmananan kini og mga plato sa karaang mga tawo kon dunay kaslon diin magbilin lang sila og puti nga panapton. Nahunong kini, matod sa kapitan, dihang buak na ang mga plato nga gipang-uli.
Ang Kandungaw Peak, matod ni Anecito Dicdiquin, 46, ug guide, gikan sa Cebuano root word “dungaw” nga nagpasabot nga motambo sa ubos.
Matod niya niadtong panahon sa gubat, kini maoy dangpanan sa katigulangan nga nanago gikan sa mga Hapon. Motambo sila sa ubos ug kon dunay makit-an nga mga sundawong Hapon nga nanungas, maglumbaanay sila og tago sa langob.
Plano sa mga opisyal sa Barangay Maloray nga magbutang og Stations of the Cross, zipline, ug hanging bridge sa mga peak.
Bayranan
● P30 (regular), P20 (senior citizen) - Entrance fee
● P200 - Guide (minimum pito ka tawo)
● P200 - Kon mag-camping abang sa tent
● P50 - Kon dunay tent (space)
Angay buhaton
● Magparehistro daan sa receiving area
● Di magpasagad og labay sa mga basura
● Magdala og tubig, ionic drinks, pagkaon ug payong
● Magsul-ob og trekking shoes ug pants, rash guard o dry-fit shirt, arm guards, kawo