Way umento hangtod Marso

WAY mahitabo nga pag-usbaw sa pletihan sa mga publikong sakyanan hangtod sa Marso ning tuiga bisan kon misaka ang presyo sa mga produktong petrulyo gumi­kan sa Tax Reform for Acceleration and Inclusion (TRAIN) Law, sumala sa dakong opisyal sa Land Transpor­tation Franchising and Regulatory Board sa Central Visayas.

Matod ni LTFRB 7 Director Ahmed Cuizon nga giobserbahan pa ang paglihok sa presyo sa lana ug sa ubang palaliton tungod sa excise tax ubos sa TRAIN Law.

“Sa akong nahibaw-an, dili gyud ingon ana kadali ang paghimog desisyon mahitungod sa plitehan kay gawas sa isyu sa TRAIN, naa man pod ang mga kalamboan kabahin sa Public Utility Vehicle Modernization Program,” pagpasabot sa director sa chat message sa Superbalita Cebu kagahapon.

Si LTFRB Board Member Aileen Lizada unang nipasabot nga sa maong mga panahon tun-an og maayo sa board ang giduso nga mga petition sa mga transport group nga nangayo og umento sa pletihan.

Mokonsulta ang LTFRB sa National Economic and Development Authority (Neda) alang sa makiangayon nga usbaw sa pletihan alang sa mga operator, drayber ug sumasakay.

Ang director namahayag nga duha ka dagkong rason ang gikonsiderar sa paghatag og umento sa pletihan, ang paglihok sa mga presyo sa merkado tungod sa TRAIN Law ug ang pagsugod na sa pagpatuman sa PUV Modernization Program.

Si Cuizon nidugang nga niingon si LTFRB chairman Martin Delgra nga dili angayang tugotan ang pagsaka sa mga plitehan kon dili motuman ang publikong mga sakyanan sa mga rekisito sa PUV Modernization Program sama sa free wifi, dashboard camera, closed-circuit television (CCTV) camera, Global Position System (GPS) ug uban pa.

“Gani, ato namang gibalibaran ang mga bag-ong sakyanang pampubliko nga dili haum sa PUV MP. Pananglitan, ang mga jeepney nga 15 anyos, kinahanglang ilisan na gyud sa modernong mga unit,” sumala ni Cuizon.

Siya niingon kon walay ikailis, dili na matugotan nga mapadayon ang prangkisa niini ginamit ang karaang sakyanan.

Duna nay bag-o nga mga jeepney nga mapalit didto sa Manila.

Karong buwana, dunay pasiugdahan nga “roadshow” ang LTFRB 7 dinhi sa Sugbo diin ipakita ang lain-laing modelo sa modernong mga jeepney nga mahimong kapilian sa interesado nga operators.

Si Cuizon nagkanayon nga sa “roadshow” motambong og apil ang mga tighimo sa modernong jeepney units, ug mga re­presentante sa Department of Transportation (DOTR), Deve­lop­ment Bank of the Philippines (DBP), Landbank of the Philip­pines (LBP) ug LTFRB aron mo­tubag sa mga pangutana gikan sa mga operator ug publiko.