NATULDOKAN na ang isyung daw adunay kontaminasyon ang duga sa bag-ong basurahan nga nahimutang sa Barangay Pagalungan ning siyudad sa Cagayan de Oro.
Gibutyag ni Engr. Armen Cuenca bag-ong head sa City Environment and Natural Resources Office (Cenro) nga ang kabalaka ug reklamo daw kanunay gyod kini ug dili na lamang nila kaayo hatagan sa pagtagad ang importante sa siyentipikong pamaagi nakita ang resulta sa mga laboratory test nga walay kontaminasyon ang duga gikan sa basurahan.
Diin unang gikareport nga maoy hinungdan nga adunay fish kill ug gikagid nga mga residente nga maoy unang gipagawas nga resolusyon ni Kapitan Rudolfo Nacario sa Barangy San Simon uban sa iyang mga konseho.
Tungod sa maong reklamo, gipaubos ug sunod-sunod nga test ang tubig nga giingong gaagi ang duga sa basurahan ug gapaingon sa naasoy'ng barangay apan nasuta nga negatibo kini sa kontaminasyon.
Matud ni Cuenca nga sa pagkakaron, matag duha na ka bulan nilang ipaubos og test ang basurahan imbes nga matag tulo ka bulan.
Dugang ni Cuenca nga bisan ang siyudad dili makatugot niining adunay kontaminasyon kay kinsa man usab ang mamroblema niini ang siyudad lang gihapon.
Hangyo lamang niini nga unta undangon na kining mga pagduda ug siwit kalabot niini.
Si Kapitan Nacario wala pay reaksyon kalabot niini karong panahona.