MAGSAYSAY, Davao del Sur - Siyam ka mga tag-as nga kalibre sa armas ang narekober sa mga sakop sa Philippine Army 72nd Infantry Battalion human nagpahigayon og checkpoint didto sa Barangay Tacul, alas 11:20 sa gabii, Huwebes.
Gibutyag ni Senior Inspector Edilberto Cabillo, hepe sa Magsaysay Municipal Police Station, nga wa masikop ang mga suspek human paspas nga nakasibat.
Nasayran nga misukol pa ang mga suspek nga nagsakay sa duha ka motorsiklo apan nakabalos pagpabuto ang mga sakop sa 72nd IB.
Apan wa masikop ang mga suspek sanglit misutoy pagpanagan ug wa na sab nipadayon sa pagpabuto ang mga sakop sa Citizen Armed Forces Geographical Unit (Cafgu) sanglit daghan ang mga kabalayan sa sentrong bahin sa barangay.
Nahibilin sa mga gituhoang sakop sa Committee Front 72 sa mga rebeldeng New People's Army (NPA) ang ilang gisakyang motorsiklo ug ang gidala niini nga 6 ka M16 rifles, 2 ka AK rifles ug usa ka M14 rifle apil ang usa ka eksplosibo.
Gitunol sab dayon ngadto sa kapulisan sa lungsod ang maong mga armas ug eksplosibo.
Sumala ni Cabillo nga gipatas-an na ang ilang alerto human nanaghap nga planong mo-atake ang mga NPA sa ilang istasyon.
Padayon sab nga nagpatrolya ang militar sa mga bukirang bahin sa lungsod aron gukdon ang mga rebelde.