SECTIONS
Friday July 20, 2018

Perandos: Paglaum ug pagsalig

BULAN pa lang sa Enero, tuig 2018, apan kawad-on na dayon ang misugat sa mga residente sa Purok 1, Brgy. 40-D, siyudad sa Davao. Kini human naapil sa danger zone ang luna nga gitukuran sa ilang mga panimalay tungod kay kilid ra sa Davao River nga pirmi mabahaan inig motaas ang tubig sa maong sapa.

Hinungdan nga gitabangan sa City Engineer's Office ang mga lumulupyo sa maong lugar sa pag-demolish sa 150 ka panimalay nga nasulod sa first batch sa maong demolisyon.
Una pa niini, gibutyag na ni Davao City Mayor Inday Sara Duterte-Carpio nga ang pag-demolish sa mga panimalay nga naa sa bahaunon nga lugar giaprobahan sa Presidential Commission for the Urban Poor (PCUP).

Bug-at man sa kasing-kasing nga nasugdan sa kawad-on sa panimalay ang bag-ong tuig sa pipila ka mga lumulupyo sa maong lugar, makita lang gihapon sa ilang mga pahiyom ang paglaum ug pagsalig sa Ginoo nga makatindog pagbalik gikan sa kawad-on.

Sa pikas bahin, ang bulan sa Enero mao sab ang bulan kon diin giselebrar ang kapistahan sa itom nga Nazareno. Gatusan ka mga deboto ang midagsa sa San Pedro Cathedral sa dalang San Pedro, siyudad sa Davao aron nga makahikap ug mapahid ang ilang mga dalang panyo sa imahe sa pagsalig nga tubagon sa Nazareno ang ilang mga pag-ampo ug panginahanglan.

Gisikway sa mga deboto ang kadaghanon sa mga tawo ug nakigdutdot aron lang makaduol sa maong imahe.

Mga tawo nga nagkadaiya ang pangedaron ug nagagikan sa nagkadaiya sab nga lugar ang midagsa sa maong simbahan ug nakigduyog sa pagsaulog sa kapistahan.

Nagkadaiyang gigikanan apan managsama ang pagtuo ug pagsalig nga matubag ang tanan nilang pangamuyo diha sa itom nga Nazareno.

Unang bulan, klase-klaseng pagbati. Taliwala sa mga panghitabo sa kinabuhi angay nga magpadayon gihapon kita ug huptan ang atong pagsalig sa Labaw nga Makagagahom tungod kay Siya lamang ug wa nay lain pa ang tubag sa atong mga pangamuyo.


VIEW COMMENTS