IPA-TERMINATE na sa pundok sa mga operator sa bus ug mini bus ang memorandum of agreement tali sa kagamhanan sa lalawigan sa Sugbo aron mapatuman ang insaktong pletihan nga gitugot sa Land Transportation Franchising and Regulatory Board.
Si Julito “Julie” Flores, presidente sa Cebu Provincial Bus and Minibus Operators Cooperative, nibutyag nga gusto na nila ipatuman ang pletihan nga nalatid sa taripa nga giaprobahan sa LTFRB alang sa mga bus ug mini bus nga P6 alang sa unang lima ka kilometros ug dugang P1.20 alang sa mosunod nga kilometro.
Ugma, magtigom ang mga operator sa bus ug minibus aron uyonan kon kanus-a ipatuman ang insaktong pletihan diin apil sa gidapit ang mga opisyal sa provincial government, LTFRB ug Land Transportation Offfice.
Sa gipirmahan nga MOA tali sa provincial government nga girepresentahan ni Gobernador Hilario Davide III niadtong 2013, nasabotan nga P5 ang pangayuon nga pletihan sa mga bus ug minibus sa unang lima ka kilometros samtang P1 sa mosunod nga kilometro.
Si Flores nipasabot nga nahitabo ang MOA gumikan kay P30 pa ang matag litro sa diesel niadtong higayona.
Karon, niabot na og P41.25 ang matag litro sa diesel base sa gasolinahan sa siyudad sa Carcar diin kasagaran magpatubil ang mga bus ug minibus nga magbiyahian sa habagatang Sugbo.
Matod sa konsehal sa lungsod sa Barili nga angayan na ipatuman ang giaprobahan nga pletihan tungod sa sunodsunod nga pagsaka sa presyo sa mga produktong petrulyo labi na miepekto na ang Tax Reform for Acceleration and Inclusion (TRAIN) Law.
“Hinaut unta ang atong mga sumasakay dili mahiubos, madismaya kining pag-reinstate nato sa pletihan. Because duay nang katuigan nga nakapahimulos sila niini,” pagpasabot ni Flores sa pakighinabi sa Superbalita Cebu kagahapon.
Siya nihangyo sa mga sumasakay nga sabton usab ang ilang kahimtang ug sa mga drayber ug konduktor nga naapektuhan usab sa pagsaka sa presyo sa krudo ug mga palaliton.
“Tan-awon sad mi nila kay dili na kaya namo kay tanan apektado na tungod sa increase,” dugang pagpasabot ni Flores.