Luzano: Doble suweldo...Maipatungpal ngata?

DIPAY timmugaw a kas presidente ni Apo Duterte...impababtuognan ti sapatana iti sangapagilian a dinto agsanud kontra illegal a droga; korapsiyon, kriminaledad ken adu pay a parikut ti pagilian. Nia’t napasamak? Impapatina ti programa kontra droga. Adu ti naipatli, naipupok ken nakasuan. Saan a nagsardeng iti likud dagiti adu a pammabalaw ken pananglais ditoy ken uray manipud ballasiw-taaw. No iti met korapsiyon...adun a prueba wenno pammaneknek ti naipakita ti administrasyon-Duterte. Nagsasaruno dagiti inikkatna iti akem uray pay inapuentaranna idi dagitoy gapu ta am-ammo ken gagayyemna. Saan a nagpangaddua a nangkaltas kadakuada. No panggep met iti kriminaledad...adun dagiti tuggot ti administrasyon ti mangpasingked a dinto agsanud kontra krimen. Ti kadagsenan a prueba ket ti panangrippuogna iti terorismo iti lumaud nupay dipay nalpas ti gannuatna kontra kadagiti kriminal, rebelde ken terorista iti agdama. Pammasingked a no ania ti inkarim...tungpalem. Pangakong hindi napapako! Ngem aguray, pards....kasano ngata ti karina panggep iti DOBLE SUWELDO?

***

Dakkel nga isyu ken nagbalin a kontrobersiya ti naulit-ulit a kari idi ni Pres. Duterte a madoble ti suweldo dagiti taga-PNP ken AFP. Saan a mapilaw dayta a kari ta napaneknekanen ti sibubukel a pagilian no kasano ti pammateg ken panangisakit ni Apo Digong kadagiti unipormado a puwersa.

Addanto pay dagiti eksena nga ammon ti kaadduan a nagbasol ti maysa nga otoridad...ngem kasla nakabig pay laeng daytoy. Dayta met idi ti impakita a suporta ni PNP Chief Bato, saan aya. Kinapudnona, adda manen dagiti grupo dagiti pulis ti nairaman iti anomaly..ngem kasla marikna kano ti panangisakit dagiti agtuturay kadakuada. Isu a saan nga adayo a tungpalen kano ni Digong ti karina a doblado a sweldo. So..naglabas ti aldaw. Kasla makauray sa met laengen dagiti kameng ti nakuna a puersa (PNP ken AFP). Kas ramen ti kaudian a pammasingked, mismon a DBM ti nangkumpirma a nakasaganan ti pondo para iti pannakaipatungpal ti kari ken bilin ni Pres. Duterte – pannakadoble ti suweldo dagiti pulis ken soldado. Piesta, saan aya? Agasem ngay ta agdoble ti suweldom? Siguro, kunada...uray agdoble met ngatan ti pamilyam! Ngek! Joke lang! Ngem aguray, pards...kasla addan baro a damag panggep iti isyu ti DUBLADO. Nga ania koma?

***

Itay nabiit...adda panangilawlawag nga inaramid ti DBM ti kasla nangsebseb iti ganat ken ganas panggep iti doble-suweldo. Dagiti laeng kano kaskastrek ken kababaan iti ranggona a pulis ken soldado ti agdoble ti suweldoda. Haaa? Kasanon dagiti dadduma? Adda met laeng kano umentoda ngem saan a dublado. Susmarya, ganern? Kasta ti pannakailawlawagna, pards. Mabalin a nangato met laeng ti umentoda (other officers ti PNP) ngem saan a madoble kas para kadagiti nababa. Kasta aya? Natural, para kadagiti opisyales a timmuknon sadi-langit ken impierno ti arapaapda gapu iti kari a dublado a suweldo....arigda siguro ti kasla natupakan iti langdet a napasarunnuan pay iti KUA ti nuang. Piman met dagiti nangnamnama. Balitok koman, nagbanag pay laeng a gambang. Tsk TSK pasensiyan, appomi. Ti napateg, adda met laeng maited a grasya, saan a GRASA. Ti ketdi surotentayo, kailian...ket no pumudno a maawaten ita a bulan dagiti maseknan (PNP-AFP) ti doble a suweldoda. Narigat ngamin tay NASPAK A KARI.

***

Pudno a bannuar dagitoy a pannakabagi ti linteg gapu iti akemda a panangted seguridad iti biag ken sanikua ken sibubukel a pagilian. Dinto matawaran dayta a kinabannuar nupay dayta ket para laeng kadagiti napudno a pannakagi ti linteg. Adda ngamin met dagitay riper iti uneg ti nakuna a grupo. Dagita dagitay di rumbeng a makaawat iti dublado a suweldo no di ketdi, maikkatda la koman iti serbisyo wenno madusa iti pagbaludan no mapaneknekan a nabagbasolda. Ngamin ket nasakit nga amirisen nga adda dagiti padada nga unipormado ti mangisibsebba ti biagna para iti kaadduan, idinto ta agar-aramid met iti krimen dagiti kaduada. Piman met dagiti nangangato a turayen nga agtaltalek kadakuada. Sapay koma ta iti dayta a kari a pannakaipangato ti suweldoda ket agbalin koma a natibker a pondasyonda tapno dublado met koma ti nalinis a serbisyoda iti kagimongan. Agsirbi koma dayta a panangisakit ti gobyerno a kas sammakedda para iti serbisyo iti sangapagilian.

***

Malagipko manen daydi lolok. Saan a nagpulis, saan met a tulisan. Ngem managtulong ken manangisakit kadagiti mailupit-lupit. No adda agaapa, agpatnga. No adda madi nga aramid, mammagbaga. No adda agaapa nga agassawa, pagtunosenna. No adda agkasapulan, ikkanna. Serbisyo para kadagiti agkasapulan ti pilosopiana. Ngem apay ta nagsinada iti daydi burangen a lolak? Idi adda nagkasapulan iti kuarta, inikkanna. Idi adda nagkasapulan iti bagas, inikkanna. Idi adda balasang nga agkasapulan iti UGING...inikkanna. Iti UGING? Saan no di ketdi UBING ti intedna. Adda tultulengna ngamin ni lolok. Ngek! Ti adal: Narigat kano tay manangaasi amangan ta sikanto ti kaasi. Kasla kasta met laeng ti adal a masirsirmatatayo iti akem ni Pres. Duterte. Naasi..ngem adu met ti magnum-umsi. Managtulong, ngem adu met ti mangub-ublag. Isaksakitna ti sibubukel a pagilian isu nga adu dagiti ballaagna kontra kadagiti kontrabida...ngem isu met ti pakaab-ablatanna. Dayta ti kunada nga: agaramidka iti umno, dakeska. No agaramidka iti dakes....dakeska latta. Tsk tsk...Pilipinotayo a talaga.

***

Ti kadagsenan ita a kontrobersiya ket ti sasaaden dagiti MANNURSURO. Itay laeng nabiit, adda kari kadakuada nga agdoble kano ti suweldoda. Mabalin siguro a nakita ken naripirip ni Pres. Duterte a narigat ti trabaho ken akmen dagiti mannursuro kas met kadagiti pulis ken soldado. Agasem ta uray nababa ti suweldo dagiti mannursuro, ikarkarigatanda piman ti saan nga aglangan a mangisuro iti labes dagiti banbantay ken karkarayan nga inda dalliasaten. Bagyo man wenno kalgaw, addada latta dita a mangtartarabay kadagiti annaktayo. Mabalin a dayta ti nangikugnalan ni Digong a rason tapno tutupanna dagita a rigatda babaen iti pannakadoble koma ti suweldoda. Ngem ti bangsitna, adda panagkitakit ti DBM babaen kenni Budget Sec. Diokno. Awan kano ti makaanay a pondo. Bilyobilyon kano pay a pirak ti kasapulan tapno maipatungpal ti plano. In short...no dakayo dagiti maseknan a mannursuro...ania ti mariknayo? Daytoy koma a plano ti mamagsardengen kadakuada nga ag-sideline a ti la adda dita a mailaklakoda wenno mainegnegosyoda tapno agbiag laeng ti pamilyada. Ngem kasla pirak a nagbanag a bato ti amin no saan a maipatungpal ti gannuat. Nadalus ken naindaklan ti panggep ni Pres. Duterte...ngem kasla saan a sumuporta ti pondo. Sapay koma ta saan a serkan ti pulitika daytoy a kontrobersiya. Good luck apo presidente. Good luck met kadagiti mannursuro! Adios mi amor, ciao, mabalos!
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">



style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="4158864647">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph