DIGOS CITY -- Naukay ang mga molupyo sa Barangay Tiguman human nabangalan ang patay nga lawas sa usa ka dalagita nga nakasul-ob pa og uniporme sa Matti National High School, Sabado sa buntag.
Ang biktima nga si Brenda Lyn Batuto, 14, tinun-an sa Grade 7, molupyo sa lugar, gikataho nga wa na mahiuli sa ilang balay niadtong Huwebes ug wa na sab makatungha niadtong Biyernes.
Mismong ang uyoan niining si Rolly Batuto ang nakadiskobre sa biktima nga nagbuy-od sa sagbutang bahin sa lugar human gisubay niini ang di masabtang baho samtang naglakaw sa dalan.
Milutaw sa imbestigasyon sa Digos City Police Office (DCPO) nga wa nay gisul-ob nga panty ang biktima ug gituohang gilugos sa mga wa mailhing suspek.
Gilayong mihimo og imbestigasyon ang mga sakop sa Scene of the Crime Operatives (SOCO) sa lugar nga nabangalan ang biktima.
Nabangalan sab sa kapulisan ang bag, sapatos ug panty sa biktima nga gisangit sa punoan sa balite duol sa nahitaboan sa krimen.
Apan dihang nabangalan ang usa ka kolor green ug stripe nga T-shirt sa usa ka lalaki, gitudlo sa mga molupyo nga gipanag-iyahan kini sa ilang silingan nga si Victor Maglahus, 32, ulitawo.
Gumikan niini, gilayong giposasan sa kapulisan ang suspek kinsa hugot nangulipas nga dugay ra niyang gilabay ang sinina.
Samtang, giimbitahan sab sa kapulisan ang laing person of interest nga mao si John, hingkod, minyo sa lugar.
Gipailawom na sa autopsy ang patay’ng lawas sa biktima human gidala na sa punerarya sa siyudad.