PIPILA ka mga kaila nga mga tigsuporta ni Presidente Rodrigo Duterte dinhi sa Sugbo wala mawad-i sa paglaum nga motambong siya sa Sinulog 2018 bisan pa man sa anunsyo ni Presidential Assistant for Visayas Mike Dino nga dili moanhi kini.
Matod pa, niadto si Presidente Duterte sa Maskara sa syudad sa Bacolod. Didto sab siya sa Buglasan Festival sa Syudad sa Dumaguete. Unya, ang Sinulog nga maoy labing dako nga festival sa nasud na hinuon ang di tambungan?
Kon atong tan-awon pag-ayo, ang Sinulog selebrasyon sa pagkahimugso sa Kristyanismo dinhi sa South East Asia. Dili lang Pilipinas.
Gani, si San Pedro Calungsod di man sulod sa Pilipinas namatay isip usa ka martir alang kang Kristo. Apan dinhi sila nanukad sa ilang misyon sa pagsangyaw sa pagtuo kang Kristo.
Dugang pa, ang pag-abot ni Ferdinand Magellan sa Sugbo tipik na sa kasaysayan sa kalibotan kay mao kini ang unang giingon nga “circumnavigation of the world” kon ang pagtuyok sa tibuok kalibotan busa napamatud-an nga lingin diay kini.
Gawas pa gyud niini, moabot og 1.4 milyones ang botos gikan sa Sugbo alang kang Presidente Duterte. Mahiubos ang iyang mga tigsuporta kon di moanhi ang ilang pinaggang presidente.
Mao nga lisod katuohan ang istorya nga gibabagan ni PAV Dino ang imbitasyon ni Mayor Tomas Osmeña alang kang Presidente Duterte.
Di gyud ko makalimot ni kanhi mayor Mike Rama ug kanhi Bise Presidente Jojo Binay nga gigamit sa politika ang Sinulog 2016. Asa na sila karon?
Roque
Ambot lang gyud nganong walay istorya nga nigawas kabahin sa maong imbitasyon nga dinhi man unta si Presidential Spokesman Harry Roque.
Wa diay reporter nga nangutana kon unsa man gyud ang prior commitment ni Presidente Duterte nga niingon man si PAV Dino nga di makaanhi sa Sinulog kini?
Ganahan lang ko makahibawo gikan kang Roque para mahimong opisyal ang pamahayag kabahin sa schedule ni presidente. Lahi man gud ang akong nadunggan – wa man kunoy prior appointment ang presidente.
Bisan pa man, maka-intriga ang hulagway diha sa Facebook ni Roque ug Kons. Dave Tumulak nga nanan-aw sa Sinulog sa Lalawigan diha sa Cebu City Sports Center. Nabawo ko og tan-aw kon kuyog ba sa presidential spokesman si PAV Dino.Di ba kaha nga igo lang gi-counter-check ni Roque kahimtang sa Sinulog aron ma-validate ang taho nga nadawat sa Malakanyang? (@anol_cebu sa Twitter)