SA iyang hugtanong pagpanghimakak, ang “kanhi laos nga pulitiko” migamit kanako ug kang opposition Councilor Joel Garganera isip depensa sa iyang kalambigitan sa pagpatay kang Ermita barangay captain Felicisimo “Imok” Rupinta. Ang taga oposisyon mipasumbingay nga iapil siya sa pag-imbistigar gumikan sa pagduda nga adunay siyay kalambigitan.
Matod pa sa “kanhi laos nga pulitiko” nga wala siyay kalambigitan sa kamatayon ni Imok kay gani ako ug si Konsehal Garganera dako pamang buhi. Nganong unahon man niya si Imok nga nagpadala naman gani og feeler nga mobalhin ngadto sa kampo sa BOPK. Nagkasungi si Imok ug ang “kanhi laos nga pulitiko” gumikan sa mga ambulant vendors diha sa Carbon.
Alang kanako kini usa ka pamahayag og tawong yabag. Ug ako kining gi-isip nga usa ka dakong hulga sa akong kinabuhi ug sa kinabuhi ni Garganera. Tiaw nimo kanang nalisang ang pinalanggang inahan sa konsehal ning maong hulga. Nganong interesan man niya si Garganera nga igo man lang usab siyang naghimo sa iyang trabaho isip konsehal? Kon aduna siyay i-papatay mao ang iyang derektang kontra sama kang Mike Rama.
Unsa may buot ipasabot aning “kanhi laos nga pulitiko” nga iya kong gihulga aron mohilom ko sa akong trabaho isip sakop sa media sa pagyagyag sa iyang mga dautan og kuwestiyonableng binuhatan diha sa City Hall sama sa pagyatak sa tawhanong katungod sa mga Sugboanon? Dili ako mamahimong epektibo sa akong trabaho isip sakop sa media kon ako lang piyungon ang akong mga mata sa iyang mga binuhatan.
Anti-corruption kuno siya. Pagkakataw-anan. Dili siya uyon sa kurapsiyon pero unsa may gihimo sa iyang mga tawo diha sa City Hall. Kanang paghatag og pabor ngadto sa iyang suod nga mga kontraktor ug kadtong mga negosyante nga nakatabang kaniya og pundo panahon sa eleksiyon, dili ba kana kurapsiyon? Hilas kaayo paminawon. Magpalimpyo-limpyo apan otro sab nga nagkalapok sa mga dautang binuhatan. Karon, kinsay isunod human ni Imok? (bobbygnalzaro@gmail.com)