UPAT ka adlaw nalang dihang mogradwar na si Paul Patrick Laude sa Philippine National Police Academy (PNPA) dihang natuman iyang damgo nga mamahimong bombero.
Buwan man gud sa wa pa siya nigradwar dihang nagkaproblema sa quota ang Bureau of Fire Protection (BFP) sa ilang mga personnel.
Gawas sa uniporme sa bombero, gisukdan usab sila para sa pulis.
Gipahibaw sila nga sa 26 nila sa ilang batch nga nipili sa BFP, upat lang nila ang makasulod.
Gipabunot sila ug usa siya sa upat diin nakuha sa top 1 ang usa ka slot.
“Siguro plano sa Ginoo nga patabangon ko niya sa Fire (bureau), so usa ko sa tulo (nga napili).”
Usa si Laude sa PNPA batch Tagamapagitan 2013.
Ang 26-anyos kinsa kasamtangan nga City Fire Marshall sa dakbayan sa Bogo, nihimong inspirasyon sa iyang maguwang nga usa ka gradwado sa Philippine Military Academy.
Sa iyang damgo nga mahimong bombero, bisan sa pagpili og asawa, bombero gihapon ang iyang gihimong kapikas.
Hayskul siya dihang nitungha sa University of San Jose - Recoletos, diin siya usa ka varsity sa volleyball aron usab mamahimo siyang scholar sa iyang pagtungha.
Dihang padung na siya mo-graduate sa hayskul, gusto unta niya mokuha sa kursong Hotel and Restaurant Management apan nagduha-duha gihapon siya.
Didto na nga gitambagan siya sa iyang maguwang nga mosulod sa PNPA aron mahimong bombero tungod kay gusto usab niya nga moluwas og kinabuhi ingon man kabtangan.
Gipanganak si Laude sa dakbayan sa Sugbo, apan gadako siya sa dakbayan sa Carcar.
Sa pangedaron nga 22-anyos, nahimong hepe si Laude sa silingan niini nga lungsod sa Sibonga Fire Station.
Human siya madestino sa Sibonga, nahimo usab siya nga fire marshall sa Toledo ug kasamtangan usab siya nga hepe sa Special Rescue Unit sa BFP 7.
Usa si Laude nga niresponde sa bag-o lang nga sunog sa Metro Ayala.
Batan-on pa
Tungod kay nahimo siyang hepe sa bata nga pangedaron, usa ni sa hagit nga giatubang niya sa kapin upat na katuig niya sa serbisyo isip bombero sa BFP.
Kini tungod kay kasagaran sa mga anaa sa ubos niya, mga edaran na. Minyo na si Laude sa iyang bombero usab nga asawa nga si Anne, diin aduna sila’y usa ka anak.