KIBLAWAN, Davao del Sur - Gilutos na sa kapulisan sa Kiblawan Municipal Police Station ang mga bandidong ilang gika-engkuwentro didto sa Sitio Banog, Barangay Kimlawis, alas 530 sa hapon, Dominggo.
Gibutyag ni Chief Insp. Erich Von Requilman, hepe sa Kiblawan MPS nga nagpadala na og dugang puwersa ang 2nd Maneuver Platoon sa Davao del Sur Police Provincial Office (DSPPO) aron lutuson ang kapin kun kulang 20 ka mga armadong bandido nga ilang gikasangka sud sa 15 minutos.
Padayon sab nga gitambalan ang nasamdang sakop sa Civilian Volunteer Organization (CVO) nga si Geraldo Miscala Jr., kinsa nagsilbing giya sa mga pulis sa ilang pagsaka sa bukid.
Naigo si Miscala sa ubos nga bahin sa tiyan mao nga gidala dayon ngadto sa Davao del Sur Provincial Hospital.
Samtang naangol sab si PO1 Johnny Tabion Castillon Jr., human naigo sa kamot dihang nikagar ang armas niini.
Gihulagway sa kapulisan nga padung sa Barangay Ihan ang mga bandidong B'laan kinsa aduna say mga samaron human sa binakbakay.
Nakataas ang alerto sa kapulisan sa lugar aron di makalusot ang mga kriminal.