KINAHANGLAN nga magsab-it og signage nga garage sa windshield ang drayber og taxi kon padung na sa garahian ug di na mamasahero.
Si Ahmed Cuizon, director sa Land Transportation Franchising and Regulatory Board sa Central Visayas, niingon ang signage nga garage nagpasabot nga padung na mogarahe ang drayber.
“So, ma-exempted ka ana sa Oplan Isnabero. Dili ka mistil dakpon kay ni-declare naman ka nga mograhe ka,” pasabot sa director.
Matod niya kon way gisab-it nga garage signage ang drayber, kini nagpasabot nga “open for hire” ang taxi ug mahimo nga parahon og pasahero.
“Kon mobalibad gani ka, you are liable for Oplan Isnabero,” dugang ni Cuizon. Kon ang drayber sa taxi on-call usab sa iyang pasahero, kinahanglan magsab-it usab og on-call nga signage sa windshield.
Ang drayber sa taxi nga makita sa nag-viral nga video diin gilarot ang iyang buhok sa iyang babaye nga pasahero, ang ipatawag sa LTFRB 7, apil ang iyang operator.
Sumala ni Cuizon nga husayon nila ang drayber sa taxi ug ang hamtong nga babaye nga pasahero kon mahimo ug siliton kon kinsa ang nakahimo og sala.
Sa post sa usa ka Zeerex Joy Bolongaita Nacario, kini nisaysay nga nibalibad ang drayber sa taxi sa edaran nga babaye nga pasahero kay padung na mogarahe sa siyudad sa Mandaue.
Siya nidugang nga sa dihang gipara nila ang taxi, sila gipasakay kay atol usab nga sa Mandaue sila magpahatod.
Apan gikasuko kini sa babaye nga pasahero, giyawyawan ang drayber, dayon gilarot ang buhok ug gisugo ang kauban nga babaye nga kuhaan og hulagway ang plate number sa taxi.
Kini nahitabo niadtong Lunes pasado alas 9 sa gabii, duol sa usa ka dako nga tindahan dapit sa Basilica Minore del Santo Niño diin gikan nanimba sila si Nacario.
Ang video nag-viral nga niabot na og 6,496 ka shares ug kapin sa 6,000 ka likes hangtod sa alas 5 kagahapon sa hapon.