ANDAM na ang Police Regional Office 7 sa ilang paghatag sa siguridad sa Sinulog karong Dominggo, lakip na sa Walk with Mary ugma sa kaadlawon nga gituohan nga dugokon na usab sa mga debotong Katoliko.
Ang hepe sa PRO 7, Chief Supt. Jose Mario Espino, dunay ipatuman nga kausaban sa maong prosesyon sanglit naleksyon siya niadtong Walk with Jesus, diin siya hapit mayataki sa mga tawo nga nag-ilugay sa pagsaulog sa Basilica.
Matod ni Espino nga sa Walk with Mary, inay ang mga tawo paunhon sa prosesyon, ang karo na nga gikargahan sa imahen ni Birhen Maria maoy mag-una samtang magsunod na ang mga deboto.
Wa nay tawo nga tugotan nga makasulod sa exit gate diin inig abot sa Osmeña blvd., corner D. Jakosalem, palikuon kini sa wala ug pasubayon sa dalan Legaspi.
Moliko na usab sa tuo subay sa dalan Zamora hangtod moabot sa atubangan sa Magellan’s cross nga maoy entrada sa simbahan aron matunhay ang pagsulod sa mga tawo.
Hugot usab nga siguridad ang ilang ipatuman sa Traslacion human sa misa sa Basilica pagka buntag.
Atol sa gihimong dry run, aduna siyay gipangsugyot sa pagpakatap sa mga pulis.
Matod niya nga ang route security gitahas sa mga force multipliers samtang ang mga uniformed personnel maoy mobantay sa mga eskina.
Sa Sabado, sugdan na sa pagpakatap ang mga pulis, gikan sa Cebu Provincial Police Office lakip na sa mga silingang police office.
Subling gipahibawo ni Espino nga di pa sila makahukom kon pawngon ang tanang signal sa cellphone sa Sinulog samtang wa pa silay madawat nga seryosong hulga sa siguridad. (AYB)