KIDAPAWAN CITY - Malampuson nga nasikop ang usa ka sakop sa New People's Army (NPA) sa gilusad nga intrapment operation alas 2:00 sa hapon niadtong Martes.
Giila ang suspek nga mao si Crisanto Dandan Coyoca, 29, minyo, molupyo sa Barangay New Corilla, Makilala, North Cotabato.
Gibutyag ni Kidapawan City Chief of Police, Chief Inspector Ramel Hojilla nga nagpahigayon sila og intrapment operation sa merkado publiko sa siyudad sa Kidapawan duol sa usa ka hardware.
Sa diha nga gitunol na sa negusyante ang protection money ngadto kang Coyoca, abtik siyang gidakop ug giposasan sa mga awtoridad.
Ang suspek gitumbok nga sakop sa Guerilla Front Committee 72 sa NPA.
Nasayran nga dugay na nga gipanid-an si Coyoca sa mga pulis ug sundalo nga nangikil sa mga negusyante sa Kidapawan City.
Apan si Coyoca nag-ingon nga siya trahabante sa negusyanteng gikilkilan ug dili NPA.
Suspek gibalhog na sa prisohan sa kapulisan sa Kidapawan City ug gitakda nga pasakaan og tukmang kaso.