DALI dayon nga gidepensahan ni Talisay City Police Office chief, Supt. Jason Villamater, ang duha niya ka mga pulis nga nakapusil patay sa usa ka registered nurse nga atoa manarbaho sa Canada ug nagbakasyon lang dinhi sulod sa usa ka fast food chain sa usa ka mall sa Tabunok. Gani gihatagan pa ni Villamater og commendation sila si PO1 Erwin Denila ug PO1 Ramonito Dinapo gumikan sa ilang gihimo nga daling pag-responde sa duha ka mga pulis sa armed person alarm sulod sa fast food chain.
Ang biktima nga si Michelle Jeff Cabanero Gabutan, 33, nagpabuto sa iyang armas human magkalalis sa mga waiter ug manager sa maong establisamento. Dugay matod pa na-serve ang iyang order ug sa dihang na-serve kini, dili pa gyud mao. Kalit lang nagpabuto sa iyang dalang armas hinungdan mga nagkaguliyang ang ubang mga kustomer ug dayon panagan. Matod pa nga depressed si Gabutan gumikan kay gibuwagan sa iyang asawa. Wala usab masuta kon diin siya og armas de fuego.
Ang duha ka mga pulis, tayming nga mokaon unta sa maong fastfood chain sa dihang ilang nasugatan si Gabutan sa pultahan dayon pagawas ug bitbit pa ang iyang armas, gipusil dayon kini ni Denila. Nadala pa siya sa tambalanan apan gideklarar kini nga dead on arrival.
Self-defense ang pangangkon sa mga pulis kay miti-on man usab si Gabutan sa iyang armas ngadto kanila mao nga ilang gi-unhan. Ang mga panghitabo nakuha sa CCTV sa maong fast food chain. Makita kon mi-obserbar sila sa rules of engagement. Pero kana gong rules of engagement ma-obserbar lang kon dili diha-diha dayon nga mamiligro ang kinabuhi sa atong kapulisan.
Ato usab nga i-konsidarar ang habig sa maong mga pulis. Di man to extra-judicial killing kon di on the spot judgment to. Pero ang nakaporke aning Villamater, iya dayon nga gi-absuwelto ang iyang nga tawo pinaagi sa paghatag og commendation. Unya sa samang higayon, mo-ingon pod siya nga iyang imbestigahon ang hitabo. Iyang gi-clear na iyang mga tawo unya manawagan pa siya og imbestgasyon. Morag kaso man ni ‘nga nag-una ang kalesa kay sa kabayo’.
(bobbygnalzaro@gmail.com)