DI mominos 380 ka mga jeepney ug 20 ka minibuses ang naisyuhan og special permits sa Land Transportation Franchising and Regulatory Board aron maserbisyohan ang mga pasahero karong Sabado ug Dominggo.
Si Ahmed Cuizon, director sa LTFRB 7, nibutyag nga dunay tulo ka mga dapit sa siyudad sa Sugbo diin mahimo maka- standby ang mga jeepney ug minibuses pagpaabot sa mga pasahero nga mosalmot sa Solemn Procession sa Sabado ug Sinulog Grand Parade sa Dominggo.
Sumala niini niisyu sila og special permits aron makalabyog ang mga PUJ ug minibuses gawas sa ilang naandan nga rota diin daghang mga dalan ang sirado sa Sabado ug Dominggo gumikan Solemn Procession ug Sinulog Grand Parade.
“Luoy kaayo ang mga tawo, lagyo kaayo maglakaw. So, mao nag-isyu ta og special permits,” dugang sa director sa pakighinabi sa Superbalita Cebu kagahapon.
Si Cuizon niklaro nga regular gihapon ang pletihan sa mga pasahero sama sa naandan nga adlaw.
Ang unang waiting station naa dapit sa dan V. Sotto unahan sa Cebu Technological University ug Commission on Audit diin 115 ka mga pasaheroan nga jeepney ang giisyuhan og special permits aron makabiyahe gikan sa siyudad sa Sugbo paingon sa dakbayan sa Lapu-Lapu ug vice versa.
Laing 115 ka mga PUJ ang mobiyahe gikan sa maong dapit padung sa SM Consolacion ug North Bus Terminal, dakbayan sa Mandaue ug vice versa.
Sa habagatan, ang ikaduhang waiting station kay dapit sa Shell gas station sa dan V. Rama diin 50 ka mga PUJ ang gitugtan nga makabiyahe paingon sa Tabunok, dakbayan sa Talisay ug pabalik.
Laing 50 ka mga PUJ ang manukad sa maong lugar ug mobiyahe padung sa temporaryo nga bus terminal sa South Road Properties.
Matod ni Cuizon P10 ang pletihan.
Ang ikatulo nga waiting station mahimutang sa Compania Maritima, diin 50 ka mga PUJ ang mamasahero padung sa temporaryo nga terminal sa SRP ug pabalik.
Dugang 20 ka mga minibus ang mamiyahe gikan sa Compania Maritima padung sa temporaryo nga terminal sa SRP ug pabalik. Ang pleti kay P10 gihapon.