MAYOR Eduardo Gullas mihatag og duha ka butang nga angayang buhaton sa iya karong bag-ong hepe kinsa ni-courtesy call sa mayor kagahapon sa buntag.
Una niini ang hepe sa Talisay Police Station nga si nga si Supt. Jason Villamater gitudlong kasamtangang hepe sa lungsod sa Tuburan.
Si Sr. Supt. Alan Okubo, director sa Cebu Provincial Police Office (CPPO) maoy nangulo sa turn-over of command tali nila ni Villamater ug sa bag-ong hepe sa Talisay nga si Supt. Marlu Conag, kinsa gikan sa lungsod sa Tuburan.
Apan daling giklaro ni Sr. Supt. Okubo nga ang pagkabalhin sa duha ka mga opisyal sa ilang assignment tipik lang sa ilang normal nga proseso kon movement sa ilang organisasyon ug way kalabot ang mga kontrobersyal sa Talisay City Police Station.
Atol sa turn-over, gihagit ni Okubo sa bag-ong hepe nga si Supt. Conag mao ang pagpakunhod sa kriinalidad sa Talisay ug hingusgan ang kampanya sa ginadiling drugas.
Matod ni Okubo nga sa tanang lugar dinhi sa Sugbo ubos sa iyang hurisdiksyon ang labing taas nga crime rate mao ang dakbayan sa Talisay.
Gani, tungod sa kataas sa krimen sa Talsiay mao kini ang hinungdan nga mosaka usab ang krimen sa tibuok rehiyon.
Si Supt. Conag sa iyang bahin niingon nga dako hagit kaniya ang bag-o niyang assignment sa Talisay.
Matod niya nga tun-an una niya ang suliran sa Talisay labot sa pagpatunhay sa kahapsay ug kalinaw aron ang iyang ipatuman nga programa mahaom.
Gimandoan usab ni Okubo si Conag nga pagpagawas sa kadalanan sa iyang mga tawo aron makit-an kini sa katawhan sama sa gisulti ni Sr. Supt. Okubo ngadto kaniya.
Samtang si Supt. Villamater mipasalamat sa mga opisyal sa Talisay, katawhan ug sa iyang mga kapulisan nga bisan paman sa kadali sa iyang panahon isip hepe iyang gihulagway nga daghan siyag suliran nga giatubang apan kini tanan pulos nasulbad.
Ang mga kaso sama sa wanted nga si Jessie Largo, kaso ni Zafra, pagpangrakrak sa BJMP ug uban pa nga nahatagan niyag kasulbaran.
Sila si Villamater ug Conag nagkauban sa Special Action Force (SAF) kaniadto, apan si Conag graduwado sa Phil. National Police Academy.
Matod ni Gullas nga ang unang buhaton ni Coag mao ang pagminus sa krminalidad sa dakbayan sa Talsiay.
Samtang ikaduhang hingusgan ang kampanya batok sa illegal nga drugas, nga maoy nag-unang programa sa administrasyong Duterte. (DRT)