SAMTANG malingaw kita sa mga mabulokong mga contingent sa Sinulog parade karong adlawa, mopusta ko nga ang atong mga mata naa sa festival queen nga nag-una sa matag contingent.
Sa kasaysayan pa sa Sugbo, ang festival queen nagsimbolo sa usa sa mga asawa ni Rajah Humabon, nga gibunyagan sa ngalan nga Rayna Juana dihang nidesisyon kini nga mahimong Kristiyano.
Si Ferdinand Magellan nihatag niya og gasa nga imahen ni Senyor Santo Niño nga mao na kini karon ang naa sa Basilica del Santo Niño ug sentro sa selebrasyon nga mao ang Sinulog Festival.
Si Rayna Juana nakapabali gyud og liog gyud sa mga Katsila. “She made a regal impression on the Europeans,” matod ni Lawrence Bergreen sa iyang libro nga “Magellan’s Terrifying Circumnavigation of the Globe: Over The Edge of the World.”
Matod pa ni Pigafetta basi sa sinulat ni Bergreen: “She was young and beautiful and completely covered with white and black cloth. Her mouth and nails were very red, while on her head she wore a large hat of palm leaves in the manner of the parasol, with a crown about it of the same leaves, like the tiara of the pope.”
Matod pa, si Rayna Juana bata ug gwapa. Nagsul-ob kini og panapton nga puti ug itom. Iyang baba ug mga koko pula kaayo. Unya naa siyay sama sa dakong kawo nga ginama sa mga dahon sa lubi nga murag payong. Dayon duna kiniy korona nga sama sa tiara sa Santo Papa.
Busa kon magsud-ong kita karon sa festival queen, hunahuna si Rayna Juana sa Sugbo, nga maoy nigam sa imahen niadtong tungora.
App Users
Kagahapon, thrilling kaayo ang lumba sa Festival Queen App Users Choice kay ma-monitor man ang porsento sa mga boto real time.
Alang sa wala maka-download. Kining “Sinulog 2018” mobile app ma-download ug ma-install sa imong cellphone nga libre.
Makita nimo ang mga lain-laing mga impormasyon kabahin sa Sinulog 2018, ang listahan sa mga contingent, ang listahan sa mga kandidata sa Festival Queen competition, mga balita kabahin sa Sinulog, pagpalit og tiket.
Duna say link padung sa Facebook page sa Sinulog Foundation, sa Twitter hashtag nga #Sinulog2018 ug Instagram #Sinulog2018 nga links.
Gamit kaayo kini karong adlawa busa ayaw pagduhaduha sa pagdownload. Kon Android imong cellphone, adto download sa Play Store. Kon iphone imong gigamit, sa App Store ka download.
Nakaingon ko nga thrilling ang pagbotohay sa Festival Queen App Users’ Choice kay sikit man silang Isabel Dalag Luche sa Tribu Kandaya ug Maerylle D. Blauta sa Tribu Buyoganon.
Si Luche maoy dunay early lead. Apan nisutoy kalit si Blauta mao nga nakadaog sa titulo nga App Users’ Choice ug sa cash prize nga P10,000.
Sa competition na gyud, ang mga mananaog mao sila si Shaila Mae del Mar Rebortera sa Talisay City (Festival Queen); Mary Faith Voz Libres sa Catbalogan, Samar (1st runner up); Bianca Wilhelmina Wilemsen sa Carcar City (second runner up); Isabel Dalag Luche sa Daanbantayan (3d runner up); ug Maerylle D. Blauta sa Abuyog Leyte (4th runner up).
(@anol_cebu sa Twitter)