SA maka-usa pa, ipahigayon na usab ang kapistahan ni Senyor Santo Nino. Ug karong adlawa mao ang ika-38 ka tuig nga pagpahigayon sa Sinulog grand parade. Masaksihan na usab sa mga Sugboanon ug sa mga dumuduong ang mabulukon ug mahugyawong kalihukan sa grand parade.
Ubay-ubay gihapon nga nga Cebu based ug mga out of town contingents ang mosalmot sa Sinulog grand parade nga mao gyud ang kanunay’ng atngan sa katawhan. Daghan gihapon ang mosalmot bisan pa man sa dakong galastuhan sa mga nagpasiugda o nag-sponsor niini. Dili baya lalim ang magasto kon ang usa ka kompaniya o local government unit mosalmot sa Sinulog grand parade.
Okey lang sa mga private companies ug corporations kon mogasto silag dako kay aduna may makuha sila nga mileage o exposure bugti sa ilang gasto. Ma-promote man ang ilang mga produkto. Apan sa local government unit, unsa man ang ilang makita in return? Wala. Nganong mogasto man sila og dako aron pag-promote sa ilang LGU? Impractical.
Sama sa kaso sa Talisay City. Matod pa nga ang kagamhanan sa dakbayan mogasto og mokabat ngadto sa P8 milyones.
Bisan si Mayor Eduardo Gullas mi-angkon nga dako ra kaayo ang kantidad. Kini human siya atakiha sa mga netizens sa social media. Aber, kon gidak-an siya nganong iya man gitugutan ang maong gahin sa dihang ang komite mi-proponer sa maong gahin?
Unya unsa man ang makuha sa Talisay City bugti sa maong gahin? Unsa may ilang i-promote? Wala? Sus, kanang maong kantidad daghan na kaayong matukod nga mga school building o mga proyekto nga makapahimulos ang mga Talisaynon. Nganong ipamugos man gyud nato? Unya maayo ra ba og kuwarta personal na ni Gullas. Pero kuwarta sa mga magbubuhis. Mosalmot lang gyud ta para sa debosyon sa Balaang Bata? Masuko pa hinoon ang Senyor Santo Niño ana nga bisan wala mopugos gyud ta og gasto. Pit Senyor sa tanan. (bobbygnalzaro@gmail.com)