PITO ka tawo ang nangamatay, lima niini mga doktor, ug tulo ang nangaangol dihang nabangga ang ilang gisakyan nga van sa punoan sa mahogany sa Barangay Legaspi, lungsod sa Alegria, habagatang Sugbo.
Ang nangamatay mao sila si Aurora Gagni, Joseph Huang, Juvella Huang, Nunilo Rubio, Rey Pascual, Diana Pascual, Berniti Rojas samtang ang nangaangol mao sila si Leonor Tsai ug Fred Tsai ug laing usa pa ka biktima.
Si Sr. Insp. Efren Diaz Jr., hepe sa Alegria Police Station, nibutyag nga niangkon ang drayber ug tag-iya sa van nga si Gilbert dela Cruz nakatagpilaw kini samtang nagmaneho hinungdan sa aksidente.
Nihimakak kini nga nigamit siya og gidili nga drugas sa wala pa mobiyahe.
“Nakatulog siya, pagka gising niya ganoon na ang nangyari. Four days straight siya nag-dadrive at isang oras lang daw ang tulog niya,” sulti ni Diaz sa Superbalita Cebu base sa giasoy sa driver ngadto niya.
Si Dela Cruz, 44, kanhi seaman, ug taga Barangay Guiwanon, lungsod sa Argao, nakaangkon og samad sa iyang paa ug nanakit usab ang iyang bukobuko, gidakop sa kapulisan aron ipaubos sa drug test sa Crime Laboratory sa Cebu Provincial Police Office.
Ang tulo ka mga angol gidala sa pribadong tambalanan sa dakbayan sa Sugbo.
Sumala ni Diaz, nga wala una mohatag sa pangan sa mga nangamatay, nitug-an nga upat niini kay mga babaye samtang ang tulo kay mga lalake. Sa pito, lima ang mga doktor, usa ang nars ug usa ang engineer.
Ang unom gideklarar nga dead on arrival sa Reinhard Wirtgen Memorial Hospital sa Barangay Poblacion, Alegria samtang ang usa didto na mamatay sa Malabuyoc District Hospital.
Ang mga biktima kay dunay medical mission sa Camiguin ugmang adlawa.
Naabot sila sa Sugbo kagahapon sa alas 3 sa kaadlawon diin una silang niadto sa lungsod sa Oslob alang sa whale shark watching.
Padung na unta sila sa Kawasan Falls sa lungsod sa Badian dihang nahitabo ang disgrasya.
Gibahin sila sa duha ka grupo, diin ang usa ka grupo luwan sa laing van ug nauna na sa mga biktima.
Usa sa mga sakay niini ang nipahibawo na sa mga tagtungod sa mga biktima bahin sa aksidente.
Si Diaz nagtuo nga posible nangatulog ang mga biktima, nga mga Pilipino apan mga US citizen.
Ang mahogany nagbarog duol sa barangay hall sa Legaspi. Mga molupyo nga nakasaksi sa hitabo nisulti sa pulis nga giingong kusog ang dagan sa van.
Si Dela Cruz mag-atubang og reklamong reckless imprudence resulting in multiple homicide and physical injuries.