Garcia: Kayalan Kalayan (Lack of Freedom)

Sulung, dinan mu kung busal, isusi mo ring labi ku,
Panpanan mu ing katutwan, ing kalayan igapus mu,
Yarap mu king pibitayan ing marangal a prinsipyu,
Ing banal a katuliran isila mu king presidyu.

Panusigan da ka buri, pagkanta da kang honsana,
Palakpakan da kang matni, salbagan da kang sampaga,
Yutus na ning pangabili, agyang pusu kikyak ya
E ku rugu makatanggi…e ku makatutul keka.

Sabatan mu itang danum, itang ilug tabunan me,
Ing agus na magmaratun, mawala ing keyang inge,
Ating datang a panaun potang iti kumasna ne,
Lasaka’ne itang tabun, maglapo ya’t makamate.


~Jose M. Gallardo, Atlung Sunis ning“Kalayan”

*****

TIKDO ka karing sarili mung bitis.

Sangkap na na ning bye tamung sablang mabibye ing kalayan o katimawan magmula inyang mabyasa tamung tikdo karing sarili tamung bitis. Alang bisang bala namu at kabang-kaba ating manuru at mumutus kekatamu nung nanu ing dapat tamung gawan.

Mimwa tamu nung ating mutus kekatamu. Kamatutwanan, agyang deng pang pengari tamu teterku tamu karing utus da. Mekad e ta mu man balu nung nanu iti inyang kayanakan tamu dapot buri tamu atin tamung kalayan. E tamu buri ing makakulung. E tamu buri ing makatali. E tamu buri ing masasakal.

Inya ating dalit a sasabing, “Ayup mang malayang sulagpo, ikulung me at manangis ya; balen pa kayang sari legwan ing e magnasang makatakas?”

Milyari kanitang ating matwang malino ing mayna ne intud. Ating anak a linapit kaya bang sopan neng maglakad uling melunus ya kaya. Ing matwa, kesa keng tumula ya’t mabisa keng yampang nang saup ning anak, mimwa ya pa. “Agyu kung maglakad akung dili,” nganang mapagmaragul a sinabi. Kaybat na nita misubasub yak eng dalan. Ma’p namu asapu ne ning anak. Mangabaldugan mung anak o matwa e da buri ing mamatakad karing aliwa. Buri da timawa la.

Tatairan da la man o makatukud na la, buri da reng tau malaya la. E da buring masasabing mamatakad la kareng aliwa ba’la mung makalakad masalese. Makanyan man, datang mu rin ing mamatakad la pa mu rin karing aliwa karatang ning panaun a mangayna na la—katawan man o isip, pusu man o diwa.

Kayalan kalayan. Masulit. Alang makiburi. Alang babalak. Alang matinu panugaling tau ing buri da mamasa na la mu kareng aliwa, e da man kamaganak o kamaganak da man. Inya pin sa’t deng bingut king mumuna dang pamaglakbang dili da kayakitan lang timan a mangabaldugang asna kanyaman maging malaya king antabe o utus da reng aliwa.

Deng banal a talasalpantaya ding miyayaliwang kasalpantayanan pekilaban da mu naman ing kalayan king pamanyamba. King milabas a panaun, makatala karing aklat amlat ing pamagpakasakit da’t pamaglasa balat ding talasuyu ning Apung Ginu bang aypanglwalu ing kalayang samba salpantaya at samba. E la ditak deng miparusan at mengamate para king kalayan.

E mu naman meging saguli ing pamakilaban ding kababaynan bang mikakalayan lang mika-karapatan king alalan. E mu naman lingad kekatamu ing pamakilaban da reng e ditak para king kalayan magkyasawa king kauri da reng aliwa.

Mal a ulaga ing kalayan.

Deng bayani karing mengalabas a panaun teya da ing sarili dang kalayan at mig-bwis lang bye ra para deng kabalen da e la kayalan kalayan. Maulagang bina ing kalayan inya sa’t dakal a miyayampang king bye ra salang king kayalan kalayan.

*****

Dake Talabaldugan:

1. kisig – (palagyu) gilas, tikas. English – elegance, esp. in dress. Alimbawa king pamangamit: “Mayayakit ing tune kisig e mu king piblas at pamagdalang imalan nung e king lingatngat ning mayap a panugali.”

2. kisláp – (palagyu) ningning, luningning, kinang. English – sparkle, flash of brightness. Alimbawa king pamangamit: “Singtimyas no reng luningning da reng batwin ing kislap da ring kekang mata.”

3. kislót/kislút – (palagyu) galgal, kirut-kirut. English – quivering of muscles in newly-slaughtered animal . Alimbawa king pamangamit: “Agyang metabtab ne batal at mikawani ne ing buntuk king katawan na, e pa mu rin tinuknang ing kislut ding uyat at laman na.”

4. kismód/kismúd – (palagyu) ismid, sibi, kibit ding labi. English – curving of nlips, expressing disdain or disgust: “Pane ing kismud na ning matalik dapot mapangalalu nang kakaluguran kabang i Migs ala yang male magsalita dikil keng tagumpe na.”

5. kitáng – (palagyu) gamit panasan/pangligo kisnang taga. English – fishing line or net with many hooks. Alimbawa king pamangamit: “Mengatuklap ya balat ing lalaking tinagin keng kitang a maka-yumang king ligawan inya angga ngeni e na malyaring akalingwan.”

*****

PAMANGAPAMPANGAN: Ing aldo ning ka-20 king mumunang bulan ning banwa ya ing aldo-beytan nang Miputungang Watas Jose M. Gallardo at sana piganakan ta ya anting metung karing pepakamal at pepaulaga king Kapampangan anting Amanung Siswan, Memalen, Indung Tibwan at Budning Kalinangan. Metung yang mibukud karing talasulat at talagale kawatasan pauli ring asna karakal at alang yugse kapaglalangan a tanda na mu naman ning pamalsinta na king Kapampangan. Sana mibulalag karing kabalen tamu lakwas na karing kayanakan ing sablang mangalagung pemangawa’t penyulat na.

*****

Agkatan da kang mambag o midake nanu mang Kapampangan a kawatasan, sanese, sisti, kasuryan o nanu mang dikil king Kapampangan. Nanu mang kutang o sisti dikil king Kapampangan a misulat king Kapisik, malyaring ikutang o malinawan king talasulat. Pakiparala king email address, garciakragi@yahoo.com. E ne pu makibat keng text ing Kapisik uling megamit ya lagyu keng kapamiraytan. Nung karapatdapat ya’t makayagpang king dalerayang tuntunang Kapisik, masa kang mirinang kapakibatan at milimbag ya sanu man kareng tutuking dangka ning Kapisik. Ipisik me pamu, abe!
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">



style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="4158864647">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph