SAMA sa batang Hesus, ang kaparian ug mga relihiyuso gipahinumdoman ni Arsobispo Jose Palma nga bation ang pagka mapaubsanon, dili mapasigarbuhon sa pagtan-aw sa ilang kaugalingon ug kanunay nga malipayon sa pagserbisyo.
Ang wali sa arsobispo sa Pontifical Mass kagahapon sa Basilica Minore del Santo Niño nakasentro sa tema sa kasaulogan sa kapistahan sa balaang bata nga “Santo Niño: Inspiration of Renewed Disciples for New Evangelization” nga nagbase sa tema sa Catholic Bishops Conference of the Philippines nga tuig sa clergy ug consecrated life.
“Una, tungod kay ang Señor Santo Niño gamay nga bata unta sa renewal sa clergy ug consecrated life before the Lord we should feel small...We have nothing to brag, wa kami angay nga ikapasigarbo atubangan sa Diyos nga gamhanan,” sumala sa 65-anyos nga arsobispo.
Matod niya, sila gitawag isip mga pari ug mga relihiyuso dili tungod sa ilang katakos kondili gumikan sa gugma sa Diyos.
Si Palma nipahinumdom sa kaparian ug mga relihiyuso nga angay sila mapasalamaton ug malipayon sa gasa sa bokasyon, sa pagserbisyo sa katawhan.
Ang arsobispo nisaysay nakadawat siya og mga reklamo nga dunay mga parokyano nisulti nga dunay mga pari nga nagserbiyo nga way kalipay.
“The world knows of so much pain, of so much problem. Ayaw dungagi ang problema sa kalibotan sa imong nawong nga daw pirme nagkusmaot no,” dugang ni Palma.
Siya nidasig sa kaparian nga sundon ang pagkakugihan ni anhing Arsobispo Teofilo Camomot.
“Para nato diha siya aron mahimong model, angay sundon,” sumala ni Palma.
Siya nidugang si Camomot, manggihatagon ug matinabangon sa mga nanginahanglan labi na ang mga kabos.
Si Palma nipasabot nga angay nga magmalipayon ug magpasalamaton ang Sugbo sa grasya sa Ginuo nga gihatagan og daghang mga pari.
Ang artsidyosesis sa Sugbo ang dunay kinadaghang mga pari sa tanang diyosesis sa nasod.
Kagahapon, 80 ka mga pari ang nikonselebrar sa pontifical mass nga gipangulohan ni Palma sa pilgim center sa Basilica Minore del Sto. Niño.
Ang arsobispo nihangyo sa mga debto nga padayon sila iampo sa ilang pagpangalagad. (SCG)