OOOPPS, hapit ma-perfect ang atong fearless forecast sa Pinoy Big Brother 737. Di ba ang atong tag-an dire si Miho Nishida ug Ylona Garcia ang modaug?
Korek si Miho ang big winner sa adult housemates pero si Jimboy Martin nga dunay 56.76% ang teen big winner. Pero gamay ra silag ligas sa puntos ni Ylona Garcia with 43. 24% nga maoy second runner-up.
Mao bitaw niingon ko nga 95% accurate ang atong bolang kristal. Kay kon niingon pa kong 100%, perfect unta to. Haha!
Talatalahon
Grabe ang nakuhang boto sa 22-anyos nga si Miho Nishida, 81.96% kumparar sa iyang second runner-up nga si Tommy Esguerra, 18.04.
Daghan man gud malingaw ni Miho kay maora sad og si Melai Cantiveros nga talatalahon. Tan-awa si Yayadub, maghiwihiwi ra ang baba ang puhunan, naka-41 million tweets dayon. Karong naa na sa outside world ang PBB housemate, siguradong ang loveteam nga “TomiHo” ang sunod tutokan sa Kapamilya fans.
Karon nga batch sa PBB daghang talented sama ni Dawn, Zeus ug Ylona nga bisag dili mga big winner apan siguradong duna nay mga career sa showbiz.
“Spectre”
Abi nakog ako ray gilaay sa bag-ong James Bond movie nga “Spectre.” Pagbasa nako sa mga review sa Hollywood wa gyud diay ko masayup.
Matod sa Forbes, “Spectre is the worst 007 movie in 30 years.” Naa say niingon “the most disappointing James Bond film of all time.”
Wala man gud siyay kanang gitawag nga element of surprise. Tinuod dunay ginukdanay sa mga mahalong sakyanan, dunay babaye nga pirme niyang kauban, dunay binukbukay sulod sa tren. Typical James Bond pero dili siya bongga kumparar sa mga nangaging James Bond.
Kapoy
Kon mao man gani ni katapusang James Bond movie ni Daniel Craig, kay wala na man siya mo-renew sa iyang kontrata isip OO7, nan way lami ang iyang exit.
Kapoy tan-awon ang “Spectre” kay samok ang plot, di pareho atong nauna niyang “Quantum of Solace” ug “Skyfall” nga diretso ug paspas ang dagan sa estorya dili ka dukaon.
Basig gikapoy na si Craig sa iyang papel nga OO7 mao nang hasta ang mga nanan-aw natakdan sa iyang gibati. Wa gani siya magpakita sa iyang lawas aning salidaha. Wa say mga laysho nga party nga sagad makita sa usa ka James Bond film.
Album Launch
Finally, nakadaug na gyud si Michael Pangilinan sa “Your Face Sounds Familiar” niadtong Dominggo sa ABS-CBN, diin kuha kaayo niya ang tingog sa gi-impersonate niyang si Bono, ang singer sa U2. Maayo sad pagkahimo sa iyang prosthetics kay ang iyang nawong maora sad og si Bono.
Karong Sabado, Nov. 14, si Michael Pangilinan ang usa sa mga guests sa album launching ni “Stephanie” sa Waterfront Cebu City Hotel. Dinhi inyong makita si Michael live nga mokanta. Si Michael duna say duet sa album ni Stephanie nga siguradong ilang kantahon sa album launching.
Salamat…
Mga pahasubo sa banay sa inilang magsusulat ug direktor sa Sugbo, Alvan Claude Evangelio nga gihatud na sa iyang katapusang kapahulayan niadtong Dominggo. Ang dili nako malimtan ni Tito Al dihang gidala mi niya ni Roger Serna sa Manila dihang iyang gidawat ang duha niya ka major awards alang sa dula niyang “Calamba Joe” gikan sa Centennial Commission niadtong 1998. May you rest in peace Tito Al. Salamat sa imong kaayo. Amen.