HAPIT wa madayon ang concert sa Parokya ni Edgar diha sa Kalingawan sa Plaza Dominggo sa gabii. Apan kay well-behaved ang mosubra sa 100,000 ka mga tawo, gawas sa nadayon sa pagkanta si Chito Miranda, makasulti kita nga malampuson gyud ang Sinulog 2018.
Alang kanako man gud, dili lang opisyal nga mga kalihokan sa Cebu City Sports Center ug sa Basilica del Santo Niño ang lakip sa Sinulog festival. Apil na sab niini ang mga kalingawan.
Sa miaging Domingo, way laing kalingawan nga dako ang nakatakda gawas sa concert sa Parokya ni Edgar diha sa Plaza sa Plaza Independencia.
Gidili man ni Mayor Tomas Osmeña ang mga inom ug mga party sulod sa 300 metro gikan sa rota sa Grand Sinulog Parade.
Busa, ang bagang duot sa katawhan nga sa miaging katuigan magpunsisok diha sa Baseline ug sa Mango karon nangadto sa Plaza Independencia.
Mao nga nabalaka ang kapulisan nga basin og dili na nila makontrolar ang bagang duot nga naghuot na sa Plaza.
Apan pagkataudtaud, among nabasahan diha sa Facebook ni Mayor Osmeña nga ipadayon ang maong concert kon ma-manage ang crowd bisan daghan.
Mas maayo, matod pa, nga positibo ang mga panghitabo sa Pista ug gusto siya nga mahuman ang Sinulog nga maayo kaayo.
Apan atong nasayran nga gi-deploy ang dugang kapulisan ngadto sa Plaza kay malinawon na man ang uptown. Gi-reinforce ang puwersa nga naa sa Plaza.
Kay mahilig man ko motan- aw og mga concert, atong nabantayan nga epektibo kaayo mismo ang pagbalikbalik og istorya sa mga emcee ug sa mga abanda kabahin sa instruction sa mayor nga kon di mo-behave ang audience, undangon ang maong kalingawan.
Bisan pa man, assessment nako sa crowd nga manageable ra gyud. Ug wala ko mabalaka bisan pa og tua kilid sa stage ang akong mga anak nga babaye.
Sila si Insoy na ug ang Missing Filemon ang nag-perform dihang nakasulod ko sa Plaza ug nahimutang kuyog sa akong mga bata diha kilid sa stage.
Gisundan kini sa Aggressive Audio ug mga dancer.
Hapit ala una sa kaadlawon na nakatungtong sa stage ang bandang Parokya ni Edgar. Dihang tungora, akong gipangutana si Nagiel Banacia sa Cebu City Hall kon pila ang iyang estimate.
Matod niya, kapin pa sa 100,000 ang katawhan nga diha niadtong tungora sa Plaza Independencia. Apan nidugang si Nagiel nga dalaygon ang mga bantan-ong mga Cebuano nga nituman sa awhag sa mayor nga di mosamoksamok.
Makahihumdom man gud ko sa miaging katuigan diin subra pa sa pagtulodtulod ang nahitabo. Dunay mga nangaagol, mga awto nga gihugawhugawan ug mabuak sa bildo, magrambol, ug inig kahuman, manghigda na lang sa daplin sa dalan sa sobrang kahubog. (@anol_cebu sa Twitter)