NAKA-ASUMIR na si Chief Supt. Robert Guzman Quenery isip bag-ong regional director sa Police Regional Office (PRO 7) niadtong weeekend. Iyang gihulipan ni Chief Supt. Jose Mario Espino nga toa na gidistino sa RRO 10 nga nagbase sa Cagayan de Oro City.
Kagahapon pa siguro naka- asumir si Espino gumikan kay nanghangyo man to siya sa mga kadagkuan sa PNP nga dili una siya mo-report kay iyang tapuson ang iyang debosyon sa Senyor. Sto. Nino.
Niadtong fluvial procession sa miaging Sabado, nakit-an sa mga tigbalita si Espino nga miapil pagyayong sa imahen ni Senyor Sto. Nino paingon sa Navforcen diin nanukad ang fluvial procession.
Wala pa matubag ang mga pangutana ug mga tanghaga nganong sayo nga gitangtang si Espino dinhi sa Region 7. Unya gilabay pa didto sa Region 10 nga ubos sa Region 7 kon economic development ang hisgutan. Niadtong Hulyo pa siya milingkod. Kasagaran god sa mga PRO 7 director kon ma-relieve adto man ma-assign sa Camp Crame alang sa mas taas nga posisyon ug due for promotion dayon sa ranggo nga Director (two stars general).
Daghan ang nagduda nga ang pagka-relibo ni Espino may kalabutan sa alegasyon nga tigdawatan siya og monthly protection money o payola gikan sa mga gambling lords dinhi sa Region 7. Gani gipa-imbestigar man si Espino sa Regional Internal Affairs Service (RIAS) gumikan sa maong akusasyon.
Aduna akoy nadawat nga “white paper” nga nagbutyag sa mga binoang ni Espino ug sa iyang asawa nga si Rorie. Usa sa akusasyon nga niadtong paglingkod ni Espino sa buwan sa Hulyo, gipatawag niya ang tanang illegal gambling operators sa tibuok rehiyon og midemanda og tunga sa milyon ka pesos nga payola matag semana.
Aw, matod pa sa panultihon nga “basta adunay aso aduna gyuy kayo.” Unya ang iyang asawa nanghilabot usab sa mga polisiya diha sa regional headquarters. Mao nay magbuot kay under de saya si Espino. Mao naman gani usahay momando sa pag-relibo og mga opisyal nga dili siya ganahan. One-star general tuod si Espino apan naa pa may “four star general” nga maoy momando niya. (bobbygnalzaro@gmail.com)