ENERO 3, 2015 ang labing sakit nga adlaw sa tibuok kinabuhi ni Genevieve Vergara ug sa ilang pamilya.
Kini ang adlaw nga nabalian og pako ang 37-anyos nga ginang dihang napagan sa pagpamusil ang iyang bana nga si Allan Vergara, 42.
Wa magdahom si Genevieve nga ang ilang pag-adto sa lungsod Tarangan, lalawigan sa Samar niadtong Enero 2015 sa usa ka imbitasyon sa higala, mao na diay ang katapusan nga higayon nga kumpleto ang ilang pamilya.
Si Allan gideklarar nga dead on arrival sa tambalanan sa siyudad sa Catbalogan nga nakaangkon og samad pinusilan ubos sa iyang bat-ang sa walang bahin agi sa bala sa kalibre 45.
Alas 2 sa kaadlawon, nakig-estorya si Allan sa ilang higala nga maoy tag-iya sa balay nga ilang gisak-an sa Tarangan dihang niatake ang armado nga mga tawo ug namusil.
“Nakadungog ko og buto-buto. Nakasinggit pa siya og tabang. “Hon, napusilan mi.” Wa ko kabantay naigo na diay siya,” sugilon ni Genevieve sa Superbalita Cebu.
Ang mga suspek nasikop na.
Nisamot ang kasubo sa ginang kay ang mga nakautang nila nga moabot og dul-an P500,000 wala na magpakita ug mamayad.
Sa pagkamatay sa iyang bana, matod ni Genevieve, katunga sa iyang kinabuhi ang nawala.
Ang pundasyon sa pamilya nahugno kay nawala na ang haligi sa panimalay.
Nawala usab ang kadasig sa ilang tulo ka mga anak nga sila si Daven Soppiea, 16; Evon Christian, 14; ug Franz Anthony, 11.
Sila si Allan ug Genevieve nalambigit sa usa ka networking company ug nagnegosyo usab og handicraft sama sa souvenir items nga gitawag og Davonfranz Handicraft Collection.
Si Allan ang tagdumala sa panudlanan sa ilang negosyo samtang si Genevieve ang tigpili sa mga produkto ug desinyo, tighatag og instructions sa ilang mga trabahante ug tigkontak og suppliers ug buyers.
Siya usab ang mohimo sa finishing touch sa mga produkto sa dili pa ipadala sa mga buyer.
Ang ginang niangkon human mamatay ang iyang kapikas, dili na ingon niana kadasig ang kasaulogan nila sa Pasko, Bag-ong Tuig ug ubang okasyon sa pamilya kon itandi sa mga panahon nga buhi pa kini.
“Lahi ra kon naay papa imong mga anak, complete ang imong family. Kon pwede pa lang mopalit og laing kinabuhi, mopalit ko para sa akong bana, para mabalik akong bana,” dugang ni Genevieve.
Apan bisan sa dakong pagsulay nga nitay-og sa pamilyang Vergara, naningkamot si Genevieve nga mapadayon ang ilang negosyo nga handicraft bisan hinay kon itandi kaniadto.
Matod sa ginang, dili mahimo nga mobuhi siya sa negosyo kay kini usab ang gisaligan nga panginabuhian sa ilang mga trabahante.
“Kon mohunong ko, wala na sila’y panginabuhian. Tungod nila naka-survive sad ko. Kon wala sila, wala pud ko,” pahayag ni Genevieve.
Apil sa ilang mga produkto ang bagol nga gihimo og pitaka o key holder, bag, paypay, tokens ug ubang souvenir items diin apil sa ilang mga buyer ang Philippine National Police.
Sa dakong pagsulay sa ilang kinabuhi, si Genevieve nanlimbasog nga makakuha og kusog sa iyang pamilya, mga trabahante ug labaw sa tanan sa Ginuo.
“Sige gyud ko og ampo sa Ginuo, makig-estorya ko Niya labi na dayon katulog, mag-atubang sa altar. Magbasa sad kog bible,” dugang sa ginang.
Mapasalamaton si Genevieve nga bisan sa nahitabo sa pamilya, wa maapektuhi ang pagtungha sa ilang mga anak nga mga honor student sa ilang mga tunghaan.