NAKAANDAM na ang kapolisan sa tibuok Northern Mindanao, hilabina denhi sa Cagayan de Oro City Police Office (Cocpo), sa bag-ong bersyon sa Oplan Tokhang kon Operation Toktok Hangyo.
Gibutyag ni Police Superintendent Lemuel Gonda, kinsa tigpamaba sa PRO-Northern Mindanao, niingon nga kon unsa man ang kamandoan sa ilang dako nga si Police General Director Ronald Dela Rosa, andam nila kining sundon.
Gikatakdang ipagawas ang bag-ong bersyon sa Oplan Tokhang diin gipasabot ni Gonda nga lakip niini ang pagtokhang basi sa balido ug intelligence driven nga report kay daw basin unya og gidaot lamang.
Ang mga gitawag niini nga mga "polis tokhangers" ang gikatakdang ipaubos usab sa maayong pagbansay, diin gikinahanglan nga ubanan gyod kini sila sa pagtoktok sa mga opisyales sa barangay ug personahe sa simbahan.
Matud ni Gonda nga dili maayo paminawon nga adunay pipila gaingon nga Tokhang Bangbang.
Samtang sa iyang bahin sab ni Chief Inspector Mardy Hortillosa, iyang gibutyag nga gihulat na lamang sa Cagayan de Oro City Police Office ang mga bag-ong gabayan aron pormal nga masugdan ang operation toktok hangyo nga mao gyod ang pagtoktok ug hangyo niadtong mga nalambigit sa ginadili nga druga nga undangon kini o hangyoun nga mopaubos og rehabilistasyon. (SVB)