SOBRA libu ka mga "professional schools students" sa University of Mindanao (UM) mitambong sa Professional Schools' Day "#B2B: Back to Basic" nga natapos, Sabado sa UM Professional School Building sa Matina Campus, Davao City.
Sukwahi sa naandan nilang corporate attires, ang UM master ug doctoral students gibahin sa unom ka nagkadaiyang clusters nga gilangkuban sa Engineering (Orange Team), Offsite (Fuchsia Team), Education (Blue Team), Business Administration (Yellow Team), Arts and Sciences (Green Team) ug Criminology (Maroon Team).
Daghan sa mga partisipante gikan pa sa mga siyudad sa Surigao City, General Santos City, Cateel, Davao Oriental, Cotabato City ug Bacolod City.
Ang programa gisugdan sa usa ka parada nga gisundan sa zumba, opening ceremony ug cheering competition.
Mga tradisyunal nga duwa sama sa tug of war, patintero, takyan, kadang kadang, dampa ug candle sack race mihatag og dugang lingaw sa kalihukan.
Ang Arts and Science Green Team nanguna sa tug of war, candle sack race, ug quiz bee competition.
Miguwang kampeyon ang Eduation Team, gisundan sa Offsite Team ug College of Arts and Sciences Team.
Si UM professional school dean Eugenio Guhao Jr., sa pakighinabi Sun.Star Davao, nagkanayon nga gihimo nilang tema ang "Back to Basic" isip pahinung.od sa tradisyunal nga duwa sa mga Pinoy.
"This is also to remind our graduate school students with the basic games because some people often forget about our traditional games." (Adam B. Morrell)