Tambagi ko Noy Tikyo: Suitor

DEAR Noy Tikyo,

Tagoa lang ko sa ngalan nga Eva, 24 years old, usa ka call center agent.

Wala koy uyab sud na sa pipila ka tuig tungod kay nasakitan ko kanhi sa gibuhat sa akong boyfriend nga giilisan ko niya og lain. Tingali giilisan ko niya kay di ko guwapa unya mubo sab og height. Hinuon naka-move on nako sa among panagbuwag.

Diri ko magpatambag nimo sa akong bag-o suitor. Ang akong amiga dunay friend nga Indian national. Matud sa akong amiga nga nakagusto ang Indian nako. Buotan siya ug nagtungha dinhi sa Davao og nursing.

Ang una nakong reaksiyon di ko makig-relasyon og langyaw labi na nga Indian national siya. You know na nga mga Indian mga itom unya mga baho busa wala lang nako panumbalinga.

Apan sa dihang gipaila-ila na ko sa akong amiga niya, nausab ang akong feeling towards him kay di man diay siya itom kaayo unya di siya baho sama sa atong maobserbahan sa ubang mga Indian nationals diri. Lahi siya itandi sa iyang mga kauban. Sa akong tan-aw, buotan siya.

Angkunon ko nga naibog na sab ko niya pero akong problema di ba kaha ko magproblema kon siya ang akong ma-bana? Wala pa hinuon siya manguyab nako apan nagpasaring-saring pa lang. Palihug tambagi ko unsay akong buhaton.

Eva

*****

Eva,

Well, di man tanang Pinay nga nakabana og foreigner problematic. Kay di man tanang foreigner badlungon. Duna man sab nilay mga responsable ug buotan. Sama ra god sab natong mga Pinoy.

Wala man koy nakitang dautan kon magkauyab mo kay ulitawo man siya ug ikaw dalaga.

Apan ang ako lang matambag nimo, ayaw lang pagdali-dali sa imong desisyon. Kinahanglan nga ilhon nimo una siya og maayo. Remember, lahi baya ang atong mga kultura ug batasan itandi nila. Make friendship una niya aron nga mailhan mo siya sa hingpit. Kay kon manguyab siya nimo unya imo dayong sugton, basin unya og kanang iyang gipakita karong kabuotan nimo, lahi diay sa tinuod niyang pagkatawo.

Puriso maayo nang magkahigalaay una mo og igong panahon una mosud og relasyon. Himoang leksiyon ang nahitabo sa imong kanhi relasyon ug di magdali-dali.

Asa ra god na kon magkasinabot mo nianang Indian national. Ang importante nga klaruha una kon tinud-anay ba siya sa iyang tinguha nimo o di. Ilha ang iyang kagikan kon unsa gyud siya sa ilang lugar. Aron nga pinaagi niini, di ka magbasol sa kaulahian.

Noy Tikyo