Lariosa: Carcar, sa palwa sa kadaugan

SA taga dakbayan sa Carcar , ang Sinulog 2018 nahupong sa tumang kamabulukon dihang sila ang midaog sa unang ganti sa bangga sa Sinulog-based category ug mihakop pa sa Best in Custume.

Sa ilang pag-apil sa Sinulog sa miaging katuigan ka­nunayng ba­kante ang ilang kamot sa kadaugan. Karon, nakasakay sila sa panultion: “A quitter never wins and a winner never quits.”

Mapagarbuhon sad ko sa ilang kadaugan. Silingang lungsod ang Carcar. Gikan sa among tugkaran, 4 kilometros ang gilay-on niin. Gikan pa sa akong kabatan-on mag-anhaan ko sa Carcar.

Magduawan ako sa akong partidos sa Carcar sa Perilos ug sa dapit nga nahimutang ang karaang estasyon sa tren diin ang akong great granduncle maoy unang tagduma ug matod sa namatay kong amahan tighatag niyag bawon sa nagtungha pa siya sa Cebu Pronvincial High School.

Dihay higayon nga kada hapon anha ko mokaog sinugba ug soap no. 5 sa kan-anan sa Parking morag Larsian style. Kondi mostambay ko sa food court sa Gaisano Awayan palabay sa oras sa kahapunon.

Hangtod karon ingon ani gihapon ang akong kasuod sa Carcar ang yutang natawhan sa mga bantugang painter nga sila si Martino Abellana ug Mulong Galicano, ang international painting contest winner.

Pinuy-anan usab sa mga iladong magsusulat nga sila si Marcel Navarra, Galicano ug Arman Varga Asisclo Alcorcon ug magbabalak Diosdado Alesna. Ang bantugang mag-aawit nga si Sheryn Regis ug award winning composer nga si Manolito Languido taga diha sad.

Ang ngalang Carcar gikan sa flowering plant nga kabkad. Mao nang matag tuig adunay Kabkad Festival nga gipangulohan sa mga Sandiego ubos sa panimunil ni Val usa ka bagtikang choreographer sa Sugbo.

Ako nagtuo nga ang Carcar gikan sa pulong kabkab (to scoop, dig, bore hole) nga ang sangayng pulong (synonym) kalkal. Kay lisod paglitok ang katiguwangan, Carcar ang na­hilwas. Mao nga hangtod karon Carcar ang ngan sa dakbayan.

Motuo mo nako o di, kini ang naabot sa akong pagduki-duki sa ngalang Carcar, Ang Carcar maoy dapit nga daghang nangalkal og mga antik ug gitagong bahandi sa nangaging panahon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph